Լարիսա Ալավերդյան․ Ադրբեջանն այս ամենն իրականացնում է ՄԱԿ-ի քաջալերող լռության ներքո (ՏԵՍԱՆՅՈՒԹ)

ՀՀ առաջին ՄԻՊ Լարիսա Ալավերդյանը պարզաբանեց, թե ինչու են պարբերաբար ՄԱԿ-ի դիմաց արտահայտում իրենց բողոքը։

Այսօր Բաքվում պահվող 23 գերիներից 15-ի կեղծ դատավարությունից առաջ ՄԱԿ-ի հայաստանյան գրասենյակի առջև բողոքի ակցիայի ժամանակ նա ասաց․ «ՄԱԿ-ի կանոնադրությամբ՝ երկրները, որոնք անդամ են ՄԱԿ-ին, ոչ թե կարող են, այլ պարտավոր են իրականացնել որոշ գործողություններ, որոնք անտեսվում են համակարգային ձևով։ Ամո՛թ, ամո՛թ ՄԱԿ-ի հայաստանյան ներկայացուցչությանը, որովհետև հենց այստեղ են իրենք տեսնում, թե ինչ է տեղի ունենում»։

Ալավերդյանը նկատեց, որ քաղաքական դիրքորոշումները կարող են լինել տարբեր․ մի պետությունը կարող է պաշտպանել մեկ այլ պետության դիրքորոշումը, մյուս պետությունը՝ այլ. «Բայց մարդասիրական իրավունքը, միջազգային հումանիտար իրավունքը պարտադրում է բոլորին դադարեցնել, վերջ տալ լկտի այն գործողություններին, որոնցով Ադրբեջանը ոչ միայն ոտնահարում է միջազգային հումանիտար իրավունքի նորմերը, այլև հակադրում է իրեն։ Ցույց տվեք ինձ, ՄԱԿ-ի ներկայացուցիչներ, մի որոշում, որով դուք ոչ միայն ընդունում եք ինչ-որ կոչեր, այլև որով հստակ կիրառում եք այս կամ այն պատժամիջոցները»,-ասաց նա։

Նրա խոսքով, ՄԱԿ-ն այստեղ ունի հստակ պարտավորություններ. «Ես այստեղ գտնվող մարդկանց անունից պահանջում եմ հստակ գործողություններ, իրենց պարտականությունների կատարում: Ադրբեջանը հայ գերիներին պատանդ է պահում քաղաքական առևտրի համար, իսկ այդ ամենն արվում է ՄԱԿ-ի՝ Ադրբեջանին քաջալերող լռության ներքո։

Հիշեք, Ադրբեջանը նույնացնում է ԼՂ Հանրապետության ազգային ազատագրական պայքարի, իր ինքորոշցած լինելու պայքարը նույնացնում է տեռորիստական գործողությունների հետ։ Մենք պարտավոր ենք մշտապես բարձրաձայնել, մշտական գործողություններով ահազանգել այդ մասին։ Այն, ինչ չի անում իշխանությունը, պետք է անի հասարակությունը։ Մենք ձեզ հետ պետք է լրացնենք այն բացը, որը հանցավոր ձևով չի իրականացվում այն մարդկանց կողմից, որոնք պարտավոր են դա անել»,-ասաց նա՝ ՄԱԿ-ի ներկայացուցիչների հասցեին նետոլով «ամոթ, Դուք կրում եք ձեր ճակատին խայտառակ խարան»,-հայտարարեց Լարիսա Ալավերդյանը։

Նշենք, որ այսօր Բաքվի դատարանում մեկնարկելու է Բաքվում պահվող 23 գերիներից 15–ի դատավարությունը։

Հիշեցնենք, որ Բաքուն պաշտոնապես հաստատում է 23 հայերի գերեվարման փաստը, որոնցից 17-ը այնտեղ են հայտնվել Արցախի դեմ Ադրբեջանի սեպտեմբերյան ագրեսիայից հետո: Նրանց թվում են Արցախի ռազմաքաղաքական ղեկավարության ներկայացուցիչները` Արցախի նախկին պետնախարար, բարերար Ռուբեն Վարդանյանը, ՊԲ նախկին հրամանատար Լևոն Մնացականյանը, ՊԲ հրամանատարի նախկին տեղակալ Դավիթ Մանուկյանը, Արցախի նախկին արտգործնախարար Դավիթ Բաբայանը, ԼՂ ԱԺ նախագահ Դավիթ Իշխանյանը, Արցախի նախկին նախագահներ Արկադի Ղուկասյանը, Բակո Սահակյանն ու Արայիկ Հարությունյանը։

Ռուբեն Վարդանյանը հունվարի 16-ին ուղերձով էր դիմել՝ նշելով, որ իր ձերբակալման առաջին օրվանից ի վեր ոչ մի ցուցմունք չի տվել, միայն առաջին անգամ անուն-ազգանունն է ասել։ Նա նաև ընդգծել էր, որ իր ստորագրությամբ կազմված բոլոր արձանագրությունները կեղծ են, ու վստահեցրել՝ ճնշում է գործադրվել և՛ իր, և՛ իր փաստաբանի, և՛ թարգմանչի վրա։

News.am