«Համահայկական միասնական խորհուրդ». ՀՀ նախկին պաշտպանության նախարարը նոր ուժ է ստեղծում

ՀՀ պաշտպանության նախկին նախարար Արշակ Կարապետյանը հայտարարել է, որ նոր ուժ է ստեղծում Շիրակի թեմի առաջնորդ Միքայել արքեպիսկոպոս Աջապահյանի և Երևանի նախկին քաղաքապետ, ԱԺ նախկին փոխնախագահ Ալբերտ Բազեյանի հետ։ Այս մասին նա գրառում է արել իր ֆեյսբուքյան էջում։

Նոր ուժը կկոչվի «Համահայկական միասնական խորհուրդ»։

«Ժամանակն է միավորել ջանքերը, համախմբել մեր ժողովրդին միակ ճշմարիտ նպատակի՝ ազգային անվտանգության ապահովման և Հայոց պետականության պահպանման շուրջ»,– ասված է հաղորդագրությունում։

Բացատրելով նոր ուժի ստեղծումը` Կարապետյանը գրել է, որ իրենքհամախմբվում են, որպեսզի Հայաստանը վերականգնի իր երբեմնի հեղինակությունը։

«Գալիս ենք, որովհետև Հայաստանը կարիք ունի ամրապնդելու իր ռազմաքաղաքական կապերը դաշնակից ու բարեկամ երկրների հետ»,– ասված է հաղորդագրությունում։

Նշվում է, որ «Համահայկական միասնական խորհուրդ» նոր ուժը հիմնվում է ազգ–բանակ-եկեղեցի եռամիասնության վրա և այդ միասնությունն ազդարարելու է պետությունը պարտվողական դիրքից նորից վեր հանելու մեկնարկը։

Հիշեցնենք` Արշակ Կարապետյանը 2024 թվականի դեկտեմբերի 5-ից ՀՀ ՆԳՆ քրեական ոստիկանության գլխավոր վարչության կողմից հետախուզվում է ՀՀ նախկին քրեական օրենսգրքի 310-րդ (ձեռնարկատիրական գործունեությանն ապօրինի մասնակցելը), 308-րդ հոդ 1-ին մասի (պաշտոնեական լիազորությունները չարաշահելը), 38-308-րդ հոդ 1-ին մասի և 38-375-րդ հոդ 1-ին մասի մեղադրանքով, իսկ որպես խափանման միջոց ընտրված է բացակայելու արգելքը:

Վերջինիս նկատմամբ հայտարարված է նաև միջպետական հետախուզում:

Sputnik Արմենիա