Լոռու մարզի բազմամետաղային հանքը կվերագործարկվի. պաշարներն են հաշվում

«Սագամար» ընկերությունը նախատեսում է ավարտել Հայաստանի Լոռու մարզում գտնվող Արմանիսի ոսկի-բազմամետաղային հանքավայրի պաշարների վերահաշվարկը: Տեղեկությունը Sputnik Արմենիային հայտնեց ընկերության գլխավոր տնօրեն Ստանիսլավ Մորոզովը։

Նրա խոսքով՝ ընդհանուր գնահատման ժամանակ պետք է հաշվի առնվի խորհրդային շրջանի (1982-1988թթ.) մանրամասն հետախուզումը, անցած տարիների արդյունահանման ծավալները, ինչպես նաև 2020-21թթ. հետախուզությունը: Ընկերությունը դա իրականացրել է պաշարները ճշտելու համար, ընդ որում՝ մեծ ծավալի աշխատանք է կատարվել. երկու տարբեր մեթոդներով հորատվել են ավելի քան 18 հազար մետր ընդհանուր երկարությամբ հորատանցքեր։ Հանքավայրում մետաղների ծավալների և պարունակության վերագնահատման նպատակով «Սագամար» ՓԲԸ-ն պայմանագիր է կնքել Հայաստանի պոլիտեխնիկական համալսարանի հետ:

«Պայմանագիրը ընթացքի մեջ է, աշխատանքները նախատեսում ենք ավարտել 2025-ի առաջին եռամսյակում, իսկ հետո պետք է նախապատրաստվի և հաստատվի հանքավայրի շահագործման նորացված նախագիծը», - ասաց Մորոզովը:

Արդյունահանված և դեռևս չմշակված հանքաքարը (որը պետական հաշվեկշռում արտացոլված չէ) պետք է պահեստավորվի։ Խնդիրն այն է, որ մթնոլորտային օդի և տեղումների հետ շփման դեպքում կապար-ցինկային հանքաքարերն արագ օքսիդանում են և ոչ պիտանի դառնում հետագա վերամշակման համար (ընկերությունն արդեն ունեցել է նման բացասական փորձ)։

«Հաշվի առնելով այս հանգամանքը՝ հանքաքարի վերամշակումը պետք է կատարվի առանց ձգձգումների։ Հետևաբար, եթե գործարկում ենք, ապա ամբողջական ծրագրով»,– ընդգծեց «Սագամար» ՓԲԸ-ի գլխավոր տնօրենը։

Ձեռնարկության կայուն աշխատանքը կազմակերպելու համար ընկերության ղեկավարությունը մշակել է ռեսուրսային բազայի ավելացման ռազմավարություն:

Դրա համար ընթացիկ տարում «Սագամարը» նախատեսում է ստանալ Արմանիսի հանքավայրում նոր երկրաբանահետախուզական աշխատանքների իրականացման լիցենզիա՝ հաշվի առնելով դրա ներուժը:

Ինչ վերաբերում է բնապահպանական ծրագրերին, ապա 2022-2024 թթ-ին «Սագամար» ՓԲԸ-ի աշխատակիցներն իրականացրել են խախտված հողերի էկոլոգիական վերականգնման համալիր աշխատանքներ, այդ թվում՝ հանքավայրի չօգտագործված լցակույտերի վրա կատարել են հողի ռեկուլտիվացիա։ Դրա համար այստեղ են բերել մոտ 4000 խմ բերրի հող և ավելի քան 550 ծառ տնկել։