Սուրբ Սարգիս զորավարի մասունքն առաջին անգամ կբերվի Աշտարակի եկեղեցի

Տեառնընդառաջի տոնին Մայր աթոռ Սուրբ Էջմիածնից առաջին անգամ Աշտարակի Սուրբ Սարգիս եկեղեցի կբերվի Սուրբ Սարգիս զորավարի մասունքը։ Տեղեկությունը հայտնում է Արագածոտնի թեմը։

Նշվում է, որ մասունքը եկեղեցի կբերվի Ամենայն հայոց կաթողիկոս Գարեգին Բ–ի հայրապետական տնօրինությամբ և Արագածոտնի թեմի առաջնորդ Մկրտիչ եպիսկոպոս Պռոշյանի օրհնությամբ։

«Ձևավորված ավանդույթի համաձայն` սուրբ մասունքով կկատարվի մատաղի աղի օրհնության արարողություն և կմատուցվի սուրբ և անմահ պատարագ, սկիզբը` 10:30: Սուրբ մասունքը եկեղեցում կմնա մինչև ժամը 16:00»,– ասված է հաղորդագրությունում:

Հիշեցնենք` Հայ առաքելական սուրբ եկեղեցին Տեառնընդառաջը կամ 40-օրական Հիսուսի ընծայումը տաճարին տոնում է Աստվածահայտնությունից 40 օր հետո` փետրվարի 14-ին:

Հայ եկեղեցու կանոնի համաձայն` տոնի նախօրեին, երեկոյան ժամերգությունից հետո կատարվում է նախատոնակ: Այն ավետում է Տերունի տոնի սկիզբը:

Նախատոնակի արարողության ավարտին կատարվում է Անդաստանի արարողություն, որի ընթացքում օրհնվում են աշխարհի չորս ծագերը: Եկեղեցու կանթեղներից վերցված կրակով վառվում են խարույկներ՝ իբրև Քրիստոսի լույսի խորհրդանիշ:

Տրնդեզի ակունքները տանում են դեպի հեթանոսություն, երբ կրակի պաշտամունք կար, և տոնակատարությունը նվիրված էր Միհր Աստծուն։ Տոնակատարության իմաստն արևի ազդեցությունն ուժեղացնելն էր` կրակի օգնությամբ սառնության վրա ազդելով։

Sputnik Արմենիա