Ալեն Սիմոնյան․ Հայաստանի կողմից ռուսական հնարավոր միջնորդության ընդունումը քիչ հավանական է

Միջնորդության ռուսական հնարավոր առաջարկի ընդունումը Հայաստանի կողմից քիչ հավանական է, բայց մենք պատրաստ ենք առաջարկներ քննարկել, սակայն անցյալի փորձը մեզ շատ վատ հիշողություններ է թողել։ Այս մասին փետրվարի 11-ին լրագրողների հետ զրույցում ասել է Հայաստանի խորհրդարանի նախագահ Ալեն Սիմոնյանը։

Նա նշել է, որ Հայաստանն ունի հարցեր, որոնց պատասխանները դեռ չեն տրվել։ Որպես օրինակ Սիմոնյանը բերել է ադրբեջանական զորքերի՝ Հայաստանի ինքնիշխան տարածք ներխուժման արձագանքը ինչպես ՀԱՊԿ, այնպես էլ հայ-ռուսական պայմանագրի շրջանակում։ Նրա խոսքով՝ Ռուսաստանը պետք է գոնե քայլեր ձեռնարկեր, բայց Հայաստանը նույնիսկ քաղաքական գնահատական​​չստացավ. «Մեզ միայն ասացին, որ պարզ չէ, թե որտեղ է սահմանը։ Այս պայմաններում հայկական կողմը կարող է թերահավատորեն վերաբերվել ռուսական միջնորդության հեռանկարներին»,- ավելացրել է խորհրդարանի նախագահը։

Նա ընդգծել է, որ ռուս խաղաղապահները լքել են Լեռնային Ղարաբաղը, որտեղ պետք է պաշտպանեին հայերին, իսկ Հայաստանին մեղադրելն այն բանի համար, որ դա տեղի է ունեցել ԼՂ-ն Ադրբեջանի կազմում ճանաչելուց հետո, խուսափելու փորձ է (իրենց պատասխանատվությունից- խմբ.): Ալեն Սիմոնյանը հիշեցրել է ՌԴ նախագահ Վլադիմիր Պուտինի խոսքերը 2020թ. նոյեմբերի 9-ին հայտարարության ստորագրումից հետո, որ Լեռնային Ղարաբաղն Ադրբեջանի անբաժանելի մասն է։

Նա վստահություն է հայտնել, որ ամբողջ աշխարհը, այդ թվում՝ Ռուսաստանը, հիանալի գիտեն, թե ինչ է տեղի ունեցել, և ինչպես են հայ ժողովրդին մենակ թողել՝ բացատրելով, որ Ռուսաստանը պետք է մեծ ջանքեր գործադրի հայ ժողովրդին իր անկեղծության մեջ համոզելու համար։

«Անթույլատրելի է 100 տարին մեկ գալ և Հայաստանը պաշտպանելու կարգախոսներով հայ ժողովրդին սակարկության առարկա դարձնել։ Մենք չենք կարող մեզ թույլ տալ նման շքեղություն»,- ընդգծել է խորհրդարանի խոսնակը՝ համոզմունք հայտնելով, որ տարածաշրջանում ոչ մի գործընթաց տեղի չի ունենում առանց հիմնական խաղացողների գոնե դրական կամ բացասական միջամտության փորձերի։

«Կարծում եմ, որ Ադրբեջանի և Ռուսաստանի դաշնակցային հարաբերությունները բավական լուրջ դեր են խաղացել և խաղում են բոլոր վերջին գործընթացներում»,- նշել է Սիմոնյանը՝ որպես օրինակ բերելով Ադրբեջանի՝ կոնկրետ հարթակներում բանակցություններ վարելը և համահունչ հռետորաբանությունը Հայաստանի վերաբերյալ։

«Հայաստանի և Ադրբեջանի անկախությունն ու ինքնիշխանությունը սերտորեն փոխկապակցված են, և այս առումով ապագան մեր ձեռքերում է։ Մենք հարցերը մեկընդմիշտ լուծելու պատմական հնարավորություն ունենք»,- եզրափակել է նա։

News.am