Последние новости

Նախարար․ 2023-24 թթ. ՀՀ-ում թմրանյութերի ապօրինի շրջանառության դեպքերը նվազել են 33.2%-ով

2023–24 թթ. Հայաստանում թմրանյութերի ապօրինի շրջանառության դեպքերը նվազել են շուրջ 33.2%–ով։ Ազգային ժողովում կառավարության հետ հարցուպատասխանի ժամանակ այս տվյալը ներկայացրեց ՀՀ ներքին գործերի նախարար Արփինե Սարգսյանը։

Նրա խոսքով` փոխարենը կա թմրամիջոցների մաքսանենգության բացահայտման 111.4 տոկոս աճ։

«Սա վկայում է այն մասին, որ թմրամիջոցների իրացման պայմաններում, երբ սահմանային հատվածներում ավելի ինտենսիվ ենք աշխատում ԱԱԾ–ի և ՊԵԿ–ի հետ, ապա շատ ավելի լավ արդյունքներ ենք ունենում ու կարողանում ենք հետագայում իրացման դեպքերը կրճատել»,– ընդգծեց Սարգսյանը։

Նախարարը նշեց, որ հատկապես Իրան–Հայաստան սահմանի չեզոք գոտում 2024 թ. հնարավոր է եղել առգրավել 4.5 կգ թմրամիջոց, իսկ հետագայում ևս տասնյակ կիլոգրամներ առգրավվել են ՀՀ տարբեր սահմանային հատվածներից։

Այս տարի արդեն առգրավվել է ընդհանուր 18 կգ թմրամիջոց։

«Երբ մեծ խմբաքանակ ենք առգրավում, սա թույլ է տալիս հետագայում ավելի քիչ ջանք գործադրել իրացման դեպքերի հետևից գնալու ու դրանք բացահայտելու համար։ Բնականաբար, ավելի համալիր միջոցառումների կարիք ունենք»,– նշեց նախարարը։

Սարգսյանը տեղեկացրեց, որ ՀՀ կառավարության կողմից մշակվել է թմրամիջոցների դեմ պայքարի նոր ռազմավարություն, որը թիրախավորում է թե՛ հանրային անվտանգության, թե՛ առողջապահության, թե՛ սոցիալական վերաինտեգրման թեմանները։

Այս ռազմավարությունը, որն իր մեջ ներառում է նաև հանրակրթական հաստատություններում թմրամիջոցների թեստավորման կոնցեպտի ներդրում, շուտով կներկայացվի ՀՀ կառավարության քննարկմանն ու հաստատմանը։

Sputnik Արմենիա

 

ПОСЛЕДНИЕ ОТ АВТОРА

ПОСЛЕДНЕЕ ПО ТЕМЕ