Վաշինգտոնի դատարանը պարտավորեցրել է Թրամփի վարչակազմին վերսկսել օգնությունն այլ երկրներին

Կոլումբիայի շրջանի դաշնային դատարանը պարտավորեցրել է ԱՄՆ նախագահ Դոնալդ Թրամփի վարչակազմին ժամանակավորապես վերսկսել ԱՄՆ օգնությունն այլ երկրներին, որոնք նախկինում կասեցված էին։ Այս մասին ասված է դատարանի էլեկտրոնային տվյալների բազայում փետրվարի 13-ին հրապարակված որոշման մեջ։

Ինչպես փաստաթղթում ընդգծել է դատավոր Ամիր Ալին, Վաշինգտոնի վարչակազմը դեռևս չի ներկայացրել համապարփակ բացատրություն այն մասին, թե «ինչու էր անհրաժեշտ Կոնգրեսի կողմից հաստատված արտաքին օգնության համապարփակ դադարեցումը այդ ծրագրերի վերանայման համար»:

Վճիռը ԱՄՆ կառավարությանը պարտավորեցրել է կասեցնել օգնության արգելքը մինչև դատարանի վարույթը՝ խուսափելու «արդեն պատճառված հսկայական վնասի սրումից»: Խնդիրը վերաբերում է ամերիկյան տարբեր կազմակերպություններին և ընկերություններին հասցված վնասներին, որոնք ներգրավված են այլ երկրներին ԱՄՆ օգնություն ցուցաբերելու մեջ։

Թրամփի վարչակազմի դեմ հայցը ներկայացվել է այս շաբաթվա սկզբին մի խումբ քաղաքացիական իրավունքների խմբերի, առևտրային ասոցիացիաների և կապալառուների կողմից: Նրանք պահանջում են ամբողջությամբ վերացնել արտաքին օգնության սառեցումը։ Հայցվորներն ասում են, որ Թրամփի վարչակազմի գործողությունները լուրջ վնաս են հասցրել իրենց։

Հունվարի 25-ի գիշերը Politico-ն հայտնել է, որ ԱՄՆ պետքարտուղար Մարկո Ռուբիոն կարգադրել է անհապաղ 90 օրով դադարեցնել ֆինանսավորումը գրեթե բոլոր արտաքին օգնության ծրագրերի համար:

News.am