Ռոբերտ Քոչարյանը և Սերժ Սարգսյանը ցավակցություն են հայտնել Իշխանյանի մահվան կապակցությամբ

ՀՀ երկրորդ նախագահ Ռոբերտ Քոչարյանը և ՀՀ երրորդ նախագահ Սերժ Սարգսյանը ցավակցություն են հայտնել իրավապաշտպան, հասարակական գործիչ, «Ղարաբաղ» կոմիտեի անդամ Ավետիք Իշխանյանի մահվան կապակցությամբ։

Ավելի վաղ հայտնել էինք, որ կյանքի 70–րդ տարում այսօր առավոտյան մահացել է իրավապաշտպան, հասարակական գործիչ Ավետիք Իշխանյանը։

«Խորը ցավով տեղեկացա Ավետիք Իշխանյանի անժամանակ մահվան մասին։ Ավետիք Իշխանյանը եզակի իրավապաշտպաններից էր, որի գործունեությունը մեծ գնահատանքի է արժանի՝ որպես իրականում անվախ, սկզբունքային, պետության համար մտահոգ հասարակական գործչի»,–գրել է Ռոբերտ Քոչարյանը։

Սերժ Սարգսյանն էլ նշել է, որ խոր ցավ է ապրել` իմանալով իրավապաշտպան, հասարակական գործիչ, «Ղարաբաղ» կոմիտեի անդամ Ավետիք Իշխանյանի մահվան մասին:

«Մեր այսօրվա իրականությունը՝ Արցախի կորուստը, Հայաստանում տիրող իրավիճակի հստակ գիտակցումը վերջին տարիներին հյուծեցին այդ իրականության հետ անհաշտ և դրա պատասխանատուների հետ մինչև կյանքի վերջին օրը կռիվ տվող մտավորականին՝ բազմաթիվ գիտական աշխատանքների, հրապարակախոսական հոդվածների հեղինակ, իրավապաշտպան, հասարակական գործիչ Ավետիք Իշխանյանին: Այդ ցավն ու ցասումը լիովին արտահայտված են նրա հրաժեշտի խոսքում»,–գրել է Սարգսյանը:

Հավելենք, որ առավոտյան հարազատներից մեկը Իշխանյանի խնդրանքով նրա «Հրաժեշտի նամակն» էր հրապարակել սոցցանցի նրա էջում, որտեղ Իշխանյանը գրել էր, որ այլևս չի տեսնում որևէ հույսի շող Հայաստանի և Արցախի ապագայի համար։ Կյանքն իր համար այլևս դարձել է տառապանք, և՛ ֆիզիկապես, և՛ հոգեպես։ Ամեն գիշեր պառկելուց, մեծ հույսեր էր փայփայում, որ այլևս չի արթնանա։

Ավելի ուշ գրառմանը հավելեցին, որ տևական և անբուժելի հիվանդությունից տառապանքները չերկարաձգելու համար Ավետիքը հրաժարվել էր արհեստական սնուցումից։

Sputnik Արմենիա