Լավրով․ Ռազմական գործողությունները կդադարեցվեն, երբ բանակցություններն արդյունք տան

Ռուսաստանը կդադարեցնի ռազմական գործողություններն Ուկրաինայում միայն այն ժամանակ, երբ հակամարտության կարգավորման բանակցություններն ամուր և կայուն արդյունք տան։ Այս մասին հայտարարել է ՌԴ արտգործնախարար Սերգեյ Լավրովը։

«Նախագահը հստակ ասել է, որ մենք պատրաստ ենք բանակցել թե՛ Ուկրաինայի և թե՛ Եվրոպայի հետ, ցանկացած ներկայացուցիչներով, որոնք բարի կամքի ոգով կցանկանային օգնել խաղաղության հասնելուն։ Սակայն ռազմական գործողությունները կդադարեցնենք միայն այն ժամանակ, երբ այդ բանակցությունները տան ամուր և կայուն արդյունք, որը կբավարարի ՌԴ–ին։ Բնականաբար, ներկա իրողությունները պետք է հաշվի առնվեն», – ասել է Լավրովը։

Նրա խոսքով` կարևոր է հաշվի առնել նաև Ղրիմի, ՌԴ Դոնեցկի, Լուգանսկի, Խերսոնի և Զապորոժիեի մարզերի բնակիչների կարծիքը, որոնք իրենց ընտրությունն են արել Ռուսաստանի հետ լինելու հետ կապված։

ՌԴ նախարարը նշել է, որ Ուկրաինայի վերաբերյալ եվրոպացի քաղաքական գործիչների հայտարարությունների ֆոնին առանձնանում է ԱՄՆ դիրքորոշումը. այն հետևողական է, չի հորդորում պարզապես հաշտվել, թողնել շփման գիծը, միայն հետո մտածել` ինչ անել, մենք միշտ ընդգծել ենք, որ նման տարբերակը մեզ չի բավարարի։

Ուկրաինական ճգնաժամի կարգավորման բանակցություններում պետք է լինի «երկաթբետոնե» պայմանավորվածություն այն մասին, որ Կիևը ՆԱՏՕ-ին չի անդամակցի, ասել է Լավրովը։

ՌԴ ԱԳՆ ղեկավարը նաև հայտնել է, որ այս շաբաթ Ռուսաստանի և ԱՄՆ-ի միջև տեղի կունենան լիարժեք շփումներ դեսպանատների գծով, դրանք պետք է վերացնեն դիվանագիտական ​​առաքելությունների աշխատանքին առնչվող խոչընդոտները։ Նախորդ շաբաթ դեսպանատների աշխատանքի վերաբերյալ երկու նախնական տեխնիկական շփում է տեղի ունեցել։

Sputnik Արմենիա