ԵՄ առաջնորդները՝ պատերազմի երրորդ տարելիցին. «Ուկրաինայի ապագան ԵՄ-ում է»

«Երեք տարի առաջ Ռուսաստանը լայնամասշտաբ և անօրինական նվաճողական պատերազմ սկսեց Ուկրաինայի դեմ։ Ռուսաստանի դաժան պատերազմը միտումնավոր թիրախ է դարձնում քաղաքացիական և կարևոր ենթակառուցվածքները: Ուկրաինացի ժողովուրդը խիզախություն դրսևորեց՝ պաշտպանելով իր պետությունը և միջազգային իրավունքի հիմնարար սկզբունքները։ Մենք հարգանքի տուրք ենք մատուցում բոլոր նրանց հիշատակին, ովքեր զոհվել և կորցրել են իրենց հարազատներին՝ հանուն Ուկրաինայի անկախության և ազատության», - պատերազմի երրորդ տարելիցին հայտարարել են ԵՄ առաջնորդները, հայտնում է BBC-ի ռուսական ծառայությունը։

Եվրոպական խորհրդի նախագահ Անտոնիո Կոստան, Եվրահանձնաժողովի նախագահ Ուրսուլա ֆոն դեր Լեյենը և Եվրախորհրդարանի նախագահ Ռոբերտա Մեցոլան հայտարարության մեջ խոստացել են աջակցել Կիևին և աշխատել արդար խաղաղության ուղղությամբ:

ԵՄ առաջնորդների կարծիքով՝ Ուկրաինայի ինտեգրումը ԵՄ-ին արդեն սկսվել է. «Ուկրաինացիները ցանկություն են հայտնել լինել Եվրամիությունում։ Մենք դա ճանաչեցինք՝ Ուկրաինային տալով թեկնածուի կարգավիճակ և սկսելով անդամակցության բանակցությունները։ Ուկրաինան զգալի առաջընթաց է գրանցել անդամակցության հետ կապված բարեփոխումներում ամենադժվար հանգամանքներում: Մենք արդեն ինտեգրում ենք Ուկրաինային ԵՄ ներքին շուկայում։ Ուկրաինայի և նրա քաղաքացիների ապագան Եվրամիությունում է»։

News.am