Հռոմի պապի վիճակը փոքր-ինչ բարելավվել է

Հռոմի պապ Ֆրանցիսկոսի առողջական վիճակը փոքր-ինչ բարելավվել է, սակայն բժիշկները պահպանում են զգուշավոր կանխատեսումը։ Այս մասին հայտնել է Սուրբ աթոռի մամուլի ծառայությունը:

«Հռոմի պապի վիճակը կրիտիկական վիճակի համեմատի փոքր բարելավում է ցույց տալիս։ Այսօր ասթմատիկ շնչառական նոպաների ոչ մի դրվագ չի արձանագրվել. որոշ լաբորատոր հետազոտությունների արդյունքներ բարելավվել են»,-նշել են ծառայությունում:

Նախօրեին մամուլի ծառայությունը հայտնել էր, որ Հռոմի պապի վիճակը շարունակում է ծայրահեղ ծանր մնալ, սակայն շաբաթ օրվանից ի վեր շնչառական նոպաներ, որոնք լրացուցիչ թթվածնի կիրառում էին պահանջում, չեն եղել: Միաժամանակ նրա մոտ հայտնաբերվել է թեթև երիկամային անբավարարություն։ Պապի վիճակը ծայրահեղ ծանր էին անվանում։

Ներկայիս հաղորդագրության մեջ Վատիկանի մամուլի ծառայությունը հայտնել է, որ երիկամների անբավարարության մեղմ աստիճանի մոնիտորինգը մտահոգության տեղիք չի տալիս:

«Թթվածնային թերապիան շարունակվում է՝ թթվածնի մի փոքր նվազեցված հոսքով և տոկոսով։ Հաշվի առնելով կլինիկական պատկերի բարդությունը՝ բժիշկները դեռևս չեն փոխում կանխատեսումը»,-ասվում է հաղորդագրության մեջ։

Նշվում է, որ պոնտիֆիկոսը առավոտյան հաղորդություն է ստացել, իսկ ցերեկը վերսկսել է աշխատանքային գործունեությունը։ Երեկոյան նա զանգահարել է Գազայի հատվածի ծխական համայնք՝ աջակցություն հայտնելու։

Ավելի վաղ հաղորդվել էր, որ Հռոմի պապի հեմոգլոբինի մակարդակը բարձրացնելու համար էրիթրոցիտների երկու ներարկում է արվել: Բացի այդ, պապը շարունակում է թթվածին ստանալ քթի խողովակների միջոցով: Նրա գիտակցությունը տեղն է։

Փետրվարի 14-ին` հանդիսությունների ավարտից հետո, 88-ամյա Ֆրանցիսկոս պապը գնացել էր Հռոմի Gemelli կլինիկա՝ հետազոտություն անցնելու և բրոնխիտի բուժումը հիվանդանոցային պայմաններում շարունակելու համար: Կաթոլիկ եկեղեցու հայրապետի մասնակցությամբ միջոցառումները չեղարկվել էին։ Ավելի ուշ հետազոտությունները սկսվող երկկողմանի թոքաբորբ էին ցույց տվել։

Sputnik Արմենիա