Միացյալ Նահանգները դադարեցրել է կիբեռգործողությունը Ռուսաստանի դեմ

ԱՄՆ-ը դադարեցրել է Ռուսաստանի դեմ կիբեռգործողությունները և դրանց պլանավորումը։ Այս քայլը «լուրջ հարված» է, մանավանդ որ նման գործողությունների պլանավորումը ժամանակ և հետազոտություններ է պահանջում, հաղորդել է CNN-ը:

Պաշտոնյայի խոսքով՝ մտահոգիչ է այն, որ Ռուսաստանի դեմ հարձակողական կիբեռգործողությունների դադարեցումը Միացյալ Նահանգներին ավելի խոցելի կդարձնի Մոսկվայի կողմից հնարավոր կիբեռհարձակումների նկատմամբ: Նա նշել է, որ Ռուսաստանի Դաշնությունը հաքերների ահռելի կազմ ունի, որը կարող է խափանել Միացյալ Նահանգների կարևորագույն ենթակառուցվածքը և հավաքել գաղտնի հետախուզական տեղեկատվություն։

Միևնույն ժամանակ, CNN-ը գրել է, որ ԱՄՆ կիբեռհրամանատարության՝ բանակի հարձակողական և պաշտպանական կիբեռստորաբաժանման գործողությունների և պլանավորման դադարը տեղի է ունենում Ռուսաստանի հետ ավելի լայն լիցքաթափման հասնելու Թրամփի վարչակազմի փորձերի ֆոնին:

«Օպերատիվ անվտանգության նկատառումներից ելնելով՝ մենք չենք մեկնաբանում կամ քննարկում կիբեռհետախուզությունը, պլանները կամ գործողությունները: «Նախարար Հեգսեթի համար չկա ավելի բարձր առաջնահերթություն, քան մարտիկների անվտանգությունը բոլոր գործողություններում, ներառյալ կիբեռտարածությունը»,- ավելացրել է բարձրաստիճան զինվորականը CNN-ին՝ նկատի ունենալով ԱՄՆ պաշտպանության նախարար Փիտ Հեգսեթին:

News.am