Ռուսական տունը և Հայաստանի ԳԱ-ն Գյումրիում էքսկուրսավարների դպրոց են բացել

Ռուսական տունը («Ռոսսոտրուդնիչեստվոյի» ներկայացուցչություն) և Հայաստանի Գիտությունների ազգային ակադեմիան Գյումրիում գործարկել են էքսկուրսավարների դպրոց, հաղորդում է ներկայացուցչության մամուլի ծառայությունը:

Սա զբոսաշրջության ոլորտում առաջին կրթական ծրագիրն է, որն իրականացվում է Գիտությունների ազգային ակադեմիայի Գիտակրթական միջազգային կենտրոնի հետ համատեղ:

Էքսկուրսավարների համար դասընթացներն անցկացվում են Շիրակի պետական համալսարանի, Հայաստանի պետական տնտեսագիտական համալսարանի Գյումրու մասնաճյուղի և Շիրակի հայագիտական հետազոտությունների կենտրոնի փորձագետների մասնակցությամբ:

Ծրագիրը ներառում է չորս հիմնական մոդուլ՝ Հայաստանի պատմության վերաբերյալ ամփոփ դասախոսություններ, Ալեքսանդրապոլի (Գյումրիի անվանումը 1837-1924թթ.) պատմության վերաբերյալ խորացված դասընթաց, զբոսաշրջության կառավարման և մարքեթինգի գործնական պարապմունքներ և միջազգային զբոսաշրջության ոլորտի կարևորագույն գործիք հանդիսացող «AMADEUS» ամրագրման համակարգի յուրացում:

Նախագծին մասնակցում են ոչ միայն գործող էքսկուրսավարները, այլև ուսանողները, ինչպես նաև բոլոր նրանք, ովքեր ցանկանում են իրենց կարիերան կապել զբոսաշրջության հետ:

Ամեն ինչ սկսվեց ռուս-հայկական գործընկերության ինտերակտիվ մուլտիմեդիա քարտեզների գործարկումից, որոնցում ներառված են ռուս-թուրքական և ռուս-պարսկական պատերազմների ժամանակաշրջանները, Sputnik Արմենիայի հետ զրույցում ասաց Գյումրիի ռուսական տան ղեկավար Անտոն Բերյանևը։

Նախագծի շրջանակներում սահմանվել են կետեր ամբողջ Հայաստանում, որոնք այս կամ այն չափով արտացոլում են ռուս-հայկական պատմությունը, երկու ազգերի համագործակցությունը:

«Ներկայում ունենք 60 նման կետ։ Ժամանակի ընթացքում մենք եկանք այն եզրակացության, որ Գյումրիի որոշ հիշարժան վայրեր կարող են դառնալ յուրահատուկ զբոսաշրջային երթուղու մաս», - ասել է Բերյանևը։

Ծրագրի եզրափակիչը կլինի հեղինակային զբոսաշրջային տուրի մշակումը, որը շրջանավարտները կներկայացնեն որպես ամփոփիչ նախագիծ: