Զախարովա․ Անօդաչուների գրոհը կապված է Մոսկվա ԵԱՀԿ-ի գլխավոր քարտուղարի այցի հետ

Մոսկվայի վրա անօդաչուների հարձակումը կապված է ԵԱՀԿ գլխավոր քարտուղարի այցի հետ, հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

Ավելի վաղ Մոսկվայի և Մոսկվայի մարզի իշխանությունները հայտնել էին ուկրաինական անօդաչուների զանգվածային հարձակման մասին, ինչի հետևանքով մեկ մարդ է զոհվել, երեքը` տուժել են։ Մոսկվայի քաղաքապետ Սերգեյ Սոբյանինի տվյալներով` ՀՕՊ–ը շարունակում է հետ մղել Մոսկվայի վրա իրականացվող գրոհը։ Ներկա պահին դեպի Մոսկվա թռչող հակառակորդի 73 անօդաչու է խոցվել։

«Առաջին անգամը չէ, որ օտարերկրյա բարձրաստիճան պատվիրակության այցը Մոսկվա ուղեկցվում է Ուկրաինայի ԶՈւ–ի անօդաչուների հարձակմամբ: Ահա և այս գիշեր Կիևի ռեժիմը անօդաչու սարքեր է ուղղել դեպի մայրաքաղաք, երբ պետք է այցելի ԵԱՀԿ գլխավոր քարտուղարը: Այն կազմակերպության ղեկավարը, որին Զելենսկու հովանավորները զրկել են սկզբնական իմաստից` Եվրոպայում անվտանգության և համագործակցության ապահովումից», – նշել է Զախարովան Telegram–ի ալիքում։

ԵԱՀԿ գլխավոր քարտուղար Ֆերիդուն Սինիրլիօղլուն մարտի 11-ին աշխատանքային այցով կլինի Մոսկվայում, որտեղ բանակցություններ կունենա ՌԴ արտգործնախարար Սերգեյ Լավրովի հետ։

Հիշեցնենք, որ ուկրաինական զորքը տարբեր եղանակներով (այդ թվում` ԱԹՍ–ներով) պարբերաբար գնդակոծում և գրոհում է ՌԴ սահմանամերձ շրջանները, մասնավորապես` Բելգորոդի, Բրյանսկի, Կուրսկի և Վորոնեժի մարզերը։

Ռուսաստանը ռազմական գործողություն է սկսել Ուկրաինայում 2022 թվականի փետրվարի 24-ին։ Նախագահ Վլադիմիր Պուտինն այն անվանել է ի պաշտպանություն նրանց, որոնք Կիևի ռեժիմի կողմից 8 տարի շարունակ ենթարկվում են ծաղրուծանակի, ցեղասպանության: Դրա համար նախատեսվում է իրականացնել Ուկրաինայի ապառազմականացում և ապազգայնացում, դատի տալ բոլոր ռազմական հանցագործներին, որոնք պատասխանատու են Դոնբասի խաղաղ բնակիչների դեմ արյունալի հանցագործությունների համար: Արևմուտքի երկրներն ի պատասխան լայնածավալ պատժամիջոցներ են սահմանել Ռուսաստանի դեմ։

Sputnik Արմենիա