ՀՀ տնտեսությունն աճել է 4,1%-ով, բայց արդյունաբերությունը տուժել է. վիճակագրություն

ՀՀ տնտեսական ակտիվությունը 2025 թվականի հունվար–փետրվարին աճել է 4.1 %–ով։ Այս մասին են վկայում ՀՀ վիճակագրական կոմիտեի նախնական տվյալները։

Առավել նկատելի անկում արձանագրվել է արդյունաբերության ոլորտում՝ արտադրության ծավալները նվազել են 19,4 %–ով։

Արդյունաբերության ակտիվության նվազումն ազդել է նաև արտաքին առևտրի ցուցանիշների վրա։ Արտահանումը երկու ամսում նվազել է 2,5 անգամ՝ մինչև 1 մլրդ 41 մլն դոլար, ներմուծումը կրճատվել է 45,8 %–ով՝ մինչև 1 մլրդ 744,8 մլն դոլար: Նշենք, որ վերջին տարիներին արտաքին առևտրի աճը հիմնականում ապահովվել է վերարտահանման հաշվին:

Շինարարության և առևտրի ոլորտում աճը շարունակվում է, թեև տեմպերը 2024 թվականի համեմատ դանդաղել են։ Անցած տարի այս ոլորտների աճը հասնում էր 15–20 %–ի, իսկ այս տարվա հունվար–փետրվարին շինարարության ոլորտում աճը կազմել է 12,2 %, իսկ առևտրի ոլորտում՝ 7,8 %։

Զգալիորեն արագացել է նաև ծառայությունների ոլորտի աճը։ Եթե վերջին մեկուկես տարվա ընթացքում այն պահպանվել է մոտ 5 % կամ ավելի ցածր մակարդակում, ապա 2025 թվականի սկզբին այն հասել է 12,4 %–ի։ 2024 թվականի վերջին դանդաղումից հետո կրկին աշխուժացել է տեղեկատվական տեխնոլոգիաների և հեռահաղորդակցության ոլորտը, որտեղ գրանցվել է 5,3 % աճ։

Sputnik Արմենիա