Խոսնակի կերպարին չեն սազում․ Զախարովան՝ ՌԴ-ի հասցեին Ալեն Սիմոնյանի մեղադրանքների մասին

ՌԴ ԱԳՆ պաշտոնական ներկայացուցիչ Մարիա Զախարովան արձագանքել է ՀՀ ԱԺ նախագահ Ալեն Սիմոնյանի երեկ հնչեցրած մեղադրանքներին՝ ուղղված Մոսկվային, որը իբր հիբրիդային պատերազմ է վարում և ֆինանսավորում է հանրապետության ներքաղաքական գործընթացները:

Զախարովայի խոսքով՝ ափսոսանք է առաջացնում այն հռետորաբանությունը, որին վերադարձել է Սիմոնյանը։ Խորհրդարանի խոսնակի կերպարին չեն սազում այդ հարձակումներն ու վիրավորանքները, նկատել է ռուս դիվանագետը։

«Դա ես որպես մամլո քարտուղարուհի եմ ասում»,-կատակով հավելել է նա ՝ ակնարկելով ավելի վաղ Սիմոնյանի կողմից իր հասցեին օգտագործված հեգնական մակդիրը:

Մեկնաբանելով «Հանրապետություն» կուսակցության ղեկավարության հայտարարություններն այն մասին, որ վերջերս Երևանի Նոր Նորքի համայնքապետարանում տեղի ունեցած ծեծկռտուքն իբր հրահրվել է Ռուսաստանի դեսպանատան կողմից, Զախարովան տարակուսանք և զարմանք է հայտնել դրանց վերաբերյալ՝ ենթադրելով, որ ցավալիորեն ծանոթ բրյուսելյան ուղեցույցերը սկսում են կիրառվել նաև Հայաստանում:

«Տարբեր երկրներից ինչ ասես չենք լսել իբր մեր միջամտության մասին, ով միայն մեզ չի փորձել վիրավորական կերպով մեղադրել։ Հետո պարզվել է, որ այդ ամենը կեղծ է, սուտ և ապատեղեկատվություն», - ասել է ՌԴ ԱԳՆ պաշտոնական ներկայացուցիչը։

Ռուս դիվանագետի տեսանկյունից՝ նման հայտարարությունները չեն նպաստում առաջիկա երկկողմ շփումների համար բարենպաստ ֆոնի ստեղծմանը:

Զախարովայի համար անհասկանալի է, թե ինչի համար է արվում այս ամենը, միևնույն ժամանակ, նրա խոսքով, ցանկություն անգամ չկա հասկանալու դա։

Բացի այդ, անհասկանալի է, թե Հայաստանի ղեկավարության դեմ ինչ «հիբրիդային պատերազմի» մասին կարող է խոսք լինել, եթե ղեկավարներին հրավիրում են մասնակցելու տոնական միջոցառումներին, կան բարձր մակարդակով և ԱԳՆ գծով կանոնավոր շփումներ։

Հիշեցնենք, որ Ազգային ժողովի նախագահ Ալեն Սիմոնյանը մայիսի 5-ին լրագրողների հետ զրույցում հայտարարել էր, թե իբր «հյուսիսային հարևանը» հիբրիդային պատերազմ է վարում Հայաստանի հանրապետության դեմ: Ավելին, նրա կարծիքով, 2026 թվականի ընտրություններից առաջ այն կուժեղանա։

Sputnik Արմենիա