Միրզոյանը ճանաչեց ճգնաժամը ՍԴ-ում (ՏԵՍԱՆՅՈՒԹ)

Այնքան էլ ողջունելի տարբերակ չի, որ առանց փոխհամաձայնության գալու կառավարությունը ՍԴ դատավորի երեք թեկնածուի առաջադրի: Այս մասին, այսօր՝ հունիսի 28-ին, ԱԺ-ում լրագրողների հետ զրույցում նշեց ԱԺ նախագահ Արարատ Միրզոյանը՝ անդրադառնալով Սահմանադրական դատարանի շուրջ ստեղծված իրավիճակին և դիտարկմանը, թե հնարավո՞ր է, որ հիմք ընդունելով Վահե Գրիգորյանի հայտարարությունը, որ ՍԴ-ում կա ընդամենը 2 դատավոր, կառավարությունն իր կողմից թեկնածուներ առաջադրի:

Արարատ Միրզոյանը նշեց, որ իր կարծիքով լավագույն լուծումն այն է, որ դատարանի ձևավորմանը մասնակցություն ունեցող 4 մարմինները (կառավարություն, ԱԺ, ՀՀ նախագահ և դատավորների ընդհանուր ժողով) քննարկումներ անցկացնեն, լուծումներ գտնեն:

«Ես խոսում եմ լայն կոնսենսուսի ճանապարհով ճգնաժամի հաղթահարման մասին»,-ասաց ԱԺ նախագահը:

Նա կտրականապես չհամաձայնեց քաղաքական որոշ ուժերի դիրքորոշմանը, թե գործող իշխանությունը խնդիր է դրել զավթել ՍԴ-ում իշխանությունը. «138 տոկոսով համաձայն չեմ ձեր ձևակերպումների հետ: Ես կարծում եմ, որ ճգնաժամն առկա է անկախ նրանից Վահե Գրիգորյանի նամակը կլիներ, թե ոչ: Ի վերջո տարբեր քաղաքական, հասարակական գործիչներ տարբեր ժամանակներում տարբեր հարցեր են բարձրացնում, որոնք գրավում են հանրության ուշադրությունը, ֆիքսում են մինչ այդ եղած, բայց չնկատված խնդիրներ»:

Հարցին, թե արդյոք խնդիր է դրված, որ ՍԴ նախագահ Հրայր Թովմասյանը հեռանա, Արարատ Միրզոյանն արձագանքեց. «Հրայր Թովմասյանին փոխելու խնդիր դրված տեսականորեն չի կարող, որովհետև որևէ մեկը՝ լինի ԱԺ-ն, նախագահը, վարչապետը, թե կառավարությունը, այդպիսի լիազորությունով օժտված չէ»:

Դիտարկմանը, թե այս իրավիճակում ՍԴ-ն չպետք է որոշումներ կայացնի, մինչև իրավիճակը հանգուցալուծվի՞, նա արձագանքեց. «Հանգուցալուծման մեջ մեծ ավանդ պետք է ունենան բոլորը, այդ թվում և առաջին հերթին Հրայր Թովմասյանը: Այստեղ իր ունեցած ավանդը կարող է անգնահատելի լինել: Ես մեծ հույս ունեմ, որ պարոն Թովմասյանն իր ծանրակշիռ խոսքը կասի դեպի հանգուցալուծում»:

ԱԺ նախագահը նաև նկատեց, որ եթե անգամ Հրայր Թովմասյանը հրաժարական տա, ճգնաժամը, ըստ ամենայնի, չի հանգուցալուծվի, որովհետև ճգնաժամը Հրայր Թովմասյանի անձով չի պայմանավորված, այլ ՍԴ-ի նկատմամբ հանրային անվստահությամբ, տեղեկացնում է News.am-ը: