Последние новости

Փաստաբան. ԻՇԽԱՆՈՒԹՅՈՒՆՆԵՐԸ ՉՈՒՆԵՆ ՄԻՔԱՅԵԼ ՄԻՆԱՍՅԱՆԻ ԲԱՑԱՀԱՅՏՈՒՄՆԵՐԻՆ ՊԱՏԱՍԽԱՆԵԼՈՒ ՈՐԵՎԷ ԱՅԼ ՏԱՐԲԵՐԱԿ

Սուրբ Աթոռում ՀՀ նախկին դեսպան Միքայել Մինասյանի փաստաբան Միհրան Պողոսյանը ֆեյսբուքյան իր էջում գրառում է արել, որում ասվում է.

««Հայկական ժամանակ» օրաթերթի ինտերնետային կայքում հրապարակված նյութից տեղեկացա, որ վարույթ իրականացնող մարմինը կալանք է դրել «ենթադրաբար» Միքայել Մինասյանին պատկանող ընկերությունների բաժնետոմսերի վրա:

Նշված փաստի վերաբերյալ ՊԵԿ քննչական վարչությունից դեռևս չենք ստացել որևէ գրավոր փաստաթուղթ կամ բանավոր պարզաբանում:

Առավել տարակուսելի է, որ կալանք է դրվել ոչ միայն Միքայել Մինասյանի բարեկամներին կամ պարզապես ծանոթներին պատկանող ընկերությունների, այլև այն ընկերությունների բաժնեմասի վրա, որոնց սեփականատերերին Միքայել Մինասյանն անձնապես չի էլ ճանաչում:

Նշվածը վերջին երկու տարին անընդմեջ Միքայել Մինասյանի և նրան հետ երբևէ որևէ առնչություն ունեցած, իսկ առանձին դեպքում՝ որևէ առնչություն չունեցած անձանց և ընկերությունների նկատմամբ իրականացվող ապօրինի գործողությունների հերթական փուլն է:

Ակնհայտ է, որ երկրի քաղաքական իշխանությունները չունեն Միքայել Մինասյանի կողմից վերջին ժամանակահատվածում իրականացվող աղմկահարույց բացահայտումներին պատասխանելու որևէ այլ տարբերակ, քան ապօրինի եղանակով քրեաիրավական գործիքակազմին դիմելը՝ մի տարբերակ, որն ի սկզբանե դատապարտված է անհաջողության:

Այս պահին փորձում ենք ստանալ գույքի վրա կալանք դնելու վերաբերյալ դատավարական ակտերը՝ օրենքով սահմանված եղանակով դրանք բողոքարկելու համար:

Միաժամանակ, մեր ներողամտությունն ենք հայցում այն ընկերություններից և անձանցից, որոնք այսօր տուժում են Միքայել Մինասյանի հետ երբևէ որևէ առնչություն ունենալու համար»:

Panorama.am

    ПОСЛЕДНИЕ ОТ АВТОРА






    ПОСЛЕДНЕЕ ПО ТЕМЕ