Կալանք է դրվել Քոչարյանի ողջ գույքի վրա. պաշտպանը բողոքում է

ՀՀ երկրորդ նախագահ Ռոբերտ Քոչարյանի և մյուսների քրգործով դատական նիստի ժամանակ Քոչարյանի պաշտպան Հովհաննես Խուդոյանը և ՀՀ նախկին փոխվարչապետ Արմեն Գևորգյանի պաշտպան Էրիկ Ալեքսանյանը միջնորդություն ներկայացրին իրենց պաշտպանյալների գույքի վրա դրված արգելանքը հանելու համար։

Նիստն ընթանում է Երևանի ընդհանուր իրավասության դատարանում՝ դատավոր Աննա Դանիբեկյանի նախագահությամբ։

Ռոբերտ Քոչարյանը մասնակցում է դատական նիստին։

«2018-ի հուլիսի 30-ին ՀՔԾ–ն որոշում է կայացրել Քոչարյանի գույքը կալանքի տակ դնել, այսինքն` 2 մլն դատական ծախսերի համար դատարանը կալանք է դրել Քոչարյանի ամբողջ գույքի վրա։ Այդ որոշումն ամբողջությամբ ապօրինի է եղել»,–ասաց Խուդոյանը։

Նա հիշեցրեց, որ դեռ 2019–ին դիմել են Վերաքննիչ` Քոչարյանի գույքի վրա դրված կալանքը հանելու, և Վերաքննիչը հաստատել է իրենց դիրքորոշումը` բավարարելով բողոքը։

Սակայն, ըստ պաշտպանի, Աննա Դանիբեկյանը որոշել է Վերաքննիչի որոշմանն անդրադառնալ քննության ոչ այս փուլում, այլ հետագայում։

Խուդոյանը հայտնեց` արգելանք է դրվել Քոչարյանի անշարժ գույքի, բաժնեմասերի, դրամական միջոցների, ակտիվների և արժեթղթերի վրա։

Քոչարյանն էլ իր հերթին հայտնեց, որ խոսքը մեկ տան մասին է, որը ստացել է պետությունից, և երկու հաշիվների մասին, որոնց վրա առկա գումարն էլ ստացել է ԱՖԿ «Սիստեմայից», որտեղ աշխատում է։

Իսկ Գևորգյանի պաշտպանը` Էրիկ Ալեքսանյանը, հայտնեց, որ գույքի վրա կալանք են դնում միայն այն դեպքում, երբ հիմքեր կան կասկածելու, որ մեղադրյալը կամ կասկածյալը, կամ այն անձը, որի մոտ գտնվում է գույքը, կարող է թաքցնել, փչացնել կամ էլ ոչնչացնել բռնագանձման ենթակա գույքը։

Նրա խոսքով` նախաքննություն իրականացնող մարմինը չի հիմնավորել, որ Գևորգյանի կողմից կա հավանական վտանգ, որ նա կարող է թաքցնել, փչացնել կամ էլ ոչնչացնել բռնագանձման ենթակա գույքը։ Պաշտպանը հայտնեց` արգելանք է դրվել Գևորգյանի մեկ հողամասի և բանկային բոլոր հաշիվների վրա։ Ավելին` Գևորգյանն այժմ աշխատավարձ է ստանում և դա նույնպես չի կարող տնօրինել։

Գործով դատախազները, առարկելով միջնորդությունը, հայտնեցին, որ ըստ օրենքի` հանցավոր ճանապարհով ձեռք բերված գույքի վրա կալանք դրվում է անմիջապես։ Նրանք պնդեցին` երկու պարագայում էլ բարձր է հավանականությունը, որ այդ գույքը կարող է օտարվել` դատարանին զրկելով ապագայում դրա նկատմամբ գույքի բռնագրավում իրականացնելու հնարավորությունից։

Դատավոր Աննա Դանիբեկյանն անշարժ գույքի արժեքի վերաբերյալ տվյալներ պահանջեց, ինչպես նաև բանկային հաշիվների մասին քաղվածքներ։ Դատավորը հայտնեց` հաջորդ նիստին պետք է այդ տվյալները ներկայացնեն։

«Դատարանի կողմից պահանջված փաստաթղթերի բացակայության պատճառով դատարանը որոշեց հետաձգել այսօրվա դատական նիստը։ Հաջորդ նիստը տեղի կունենա օգոստոսի 4-ին` ժամը 13-ին»,–ասաց Դանիբեկյանը։

Հիշեցնենք, որ այսօր Յուրի Խաչատուրովի պաշտպան Միհրան Պողոսյանը միջնորդություն էր ներկայացրել երկու օրով Խաչատուրովին ՀՀ–ից մեկնելու թույլտվություն տրամադրելու վերաբերյալ։ Խաչատուրովն ուզում էր մեկնել Վրաստան` ծննդավայր։ Դատարանը, սակայն, մերժեց միջնորդությունը։

Նշենք` Երևանի ընդհանուր իրավասության դատարանում հունիսի 23-ին վերսկսվել էր սահմանադրական կարգի ենթադրյալ տապալման գործով քննությունը։ Այս գործով անցնում են ՀՀ երկրորդ նախագահ Ռոբերտ Քոչարյանը, ՀՀ պաշտպանության նախկին նախարար Սեյրան Օհանյանը, նախկին փոխվարչապետ Արմեն Գևորգյանը և ՀԱՊԿ նախկին գլխավոր քարտուղար Յուրի Խաչատուրովը։

ՀՀ երկրորդ նախագահին մեղադրանք է առաջադրվել 2008 թ.–ի մարտի 1-ի բողոքի ակցիաները ցրելու ժամանակ սահմանադրական կարգը տապալելու համար։ Նա իրեն ուղղված մեղադրանքները քաղաքական հետապնդում է համարում, տեղեկացնում է Sputnik Armenia-ն։