Последние новости

Բելառուսի ԱԳՆ-ը պատրաստ է փաստեր ներկայացնել արտասահմանից երկրի գործերին միջամտելու մասին

Արտաքին գործերի նախարարությունը արտասահմանյան գործընկերներին կոչ է անում օբյեկտիվորեն և առանց հույզերի հասկանալ Բելառուսում տեղի ունեցող իրադարձությունները՝ առանց հապճեպ հայտարարություններ անելու: Այս մասին ասված է գերատեսչության հայտարարության մեջ:

«Հաշվի առնելով եվրոպական մայրաքաղաքներից հնչող մի շարք հայտարարությունները՝ ուզում ենք ընդգծել, որ մենք անտարբեր չենք Բելառուսում կայացած նախագահական ընտրությունների ընթացքի և արդյունքների վերաբերյալ մեր արտասահմանյան գործընկերների արձագանքի հանդեպ: Իհարկե, մենք ուշադիր հետևում ենք դրան:

Միանգամայն անընդունելի է, թե որքան արագ եվրոպական մի շարք պաշտոնյաներ մեր երկրի համար ամենակարևոր քաղաքական հայտարարությունները արեցին, նույնիսկ առանց փորձելու օբյեկտիվորեն պարզել և իրատեսորեն գնահատել իրավիճակը: Բարձրագույն և բարձր մակարդակի առանձին աղմկոտ եզրակացություններ հիմնված են միակողմանի տեղեկատվության և բացահայտ ստի վրա: Մասնավորապես, հայտարարվեց մարդու մահվան մասին, նույնիսկ առանց տեղեկատվության նվազագույն ստուգման: Եվ նույնիսկ այն բանից հետո, երբ բոլորի համար պարզ դարձավ, որ դա, բարեբախտաբար, չէր համապատասխանում իրականությանը, հայտարարությունները որևէ ճշտման չենթարկվեցին: Բայց դրա հիման վրա արդեն նախատեսվում է կայացնել ԵՄ-ի հետ մեր երկրի հարաբերությունների համար ճակատագրական որոշումներ:

Ավելին, երբ մարդ իսկապես մահանում է, ողբերգությունը վերածում են ֆարսի՝ հորինելով բոլորովին անհավանական վարկածներ: Նախապես մեղավոր դարձնելով իշխանություններին:

Ավելի քան 250 տուժածներ, փողոցներում բարիկադներ, վարչական շենքեր գրավելու փորձեր... Հարձակում Լոնդոնում Բելառուսի դեսպանատան աշխատակիցների վրա: Սա դեռ խաղա՞ղ բողոք է: Էլ ի՞նչ պետք է կատարվի, որ կարծիքը օբյեկտիվ դառնա: Կբավարարի՞ քաղաքական խիզախությունը տեսնել գոնե նրանց, ովքեր ակնհայտորեն սադրում են:

Դեռևս նախընտրական քարոզարշավից առաջ մենք դիմեցինք մեր գործընկերների օգնությանը՝ խոսելով ուղղակի արտաքին միջամտության փաստերի մասին: Մենք բազմիցս առաջարկել ենք ձեզ՝ այսօր մեզ քննադատողներին, միասին պարզել, թե ինչ է կատարվում։

Դրա փոխարեն, երկրորդ օրը արդեն պատժամիջոցների կոչեր են հնչում: Եվ դրանից հետո ինչպե՞ս կարող ենք հավատալ ձեր խորհուրդների անկեղծությանը:

Այո, մենք ԵԱՀԿ / ԺՀՄԻԳ-ին հրավիրեցինք սովորականից ուշ: Եվ դրա համար կան մի շարք ծանրակշիռ պատճառներ, որոնց մասին մենք նախապես տեղեկացրել ենք ձեզ: Բայց մենք միշտ, բոլոր քննադատական եզրակացությունների դեպքում ընդունել ենք ընտրությունների դիտորդական առաքելությունները: Ինչո՞ւ այս անգամ այդքան պատրաստակամորեն չեկաք: Չէ՞ որ կար դա անելու հնարավորություն, չնայած կրճատ ձևաչափով, ինչպես և այլ երկրներում՝ համավարակի ժամանակ:

Մենք առաջարկում ենք օբյեկտիվ և առանց հույզերի հասկանալ, թե ինչը, ինչպես և ինչու է կատարվում այսօր Բելառուսում: Պատրաստ ենք այս թեմայի շուրջ կառուցողական և, ամենակարևորը, օբյեկտիվ երկխոսության բոլոր արտասահմանյան գործընկերների հետ: Պատրաստ ենք ներկայացնել կոնկրետ անհերքելի փաստեր, որոնք բացահայտում են ընթացիկ իրադարձությունների նախապատմությունը, ներառյալ՝ արտերկրից միջամտությունը:

Մենք կոչ ենք անում բոլոր արտասահմանյան գործընկերներին կատարել կշռադատված վերլուծություն և հաշվի առնել բոլոր դիրքերը: Մենք չենք ասում, որ պետք է հրաժարվել ձեր ավանդական տեղեկատվության աղբյուրներից և կարծիքներից: Սակայն տեղեկատվությունը միանշանակ ավելի ամբողջական և արհեստավարժ կլինի, եթե այն համակողմանի լինի, այդ թվում` հաշվի առնելով պաշտոնական տվյալները և նրանց գնահատականները, ովքեր պատասխանատու են երկրում ստեղծված իրավիճակի համար:

Դիմում ենք մեր գործընկերներին, մեր հարևաններին: Մի շտապեք անել այնպիսի հայտարարություններ, որոնք հասարակության մեջ անկայունություն են առաջացնում: Եթե սատարում եք անկախությունը և ինքնիշխանությունը, դրսևորեք ոչ միայն սկզբունքայնություն, այլև պատասխանատվություն», տեղեկացնում է News.am:

    ПОСЛЕДНИЕ ОТ АВТОРА






    ПОСЛЕДНЕЕ ПО ТЕМЕ