Լրագրողների եվրոպական եւ միջազգային ֆեդերացիաները կոչ են անում մերժել Ալեն Սիմոնյանի նախաձեռնությունը

Լրագրողների միջազգային ֆեդերացիան (IFJ) եւ Լրագրողների եվրոպական ֆեդերացիան (EFJ) արձագանքել են Հայաստանի ժուռնալիստների միության հայտարարությանը, ըստ որի՝ կոչ է արվում մերժել Ալեն Սիմոնյանի օրենսդրական նախաձեռնությունը, որով առաջարկվում էր սոցցանցերում եւ ԶԼՄ-ներում հրապարակված վիրավորանքի եւ զրպարտության համար փոխհատուցման չափը վիրավորանքի դեպքում 1 միլիոն դրամից դարձնել 5 միլիոն դրամ, զրպարտության դեպքում` 2 միլիոնից 10 միլիոն դրամ: 

«Լրագրողների միջազգային եւ եվրոպական ֆեդերացիաները միանում են իրենց դուստր ձեռնարկությանը՝ Հայաստանի լրագրողների միությանը՝ խորհրդարանին կոչ անելով չընդունել այդ առաջարկը»,- ասվում է համատեղ հայտարարության մեջ:

Ապա մեջբերվում է այս առնչությամբ Հայաստանի ժուռնալիստների միության հայտարարությունը, որում ասվում է. «Այս նախաձեռնությունը գործող իշխանությունների այն հերթական գործիքն է, որը կրկին միտված է սահմանափակելու ազատ խոսքն՝ ընդհանրապես, եւ մամուլի ազատությունը՝ մասնավորապես… Հայաստանի ժուռնալիստների միությունը, հաշվի առնելով ժողովրդավարական հասարակությունում հանրությանը հուզող խնդիրների վերաբերյալ տեղեկատվություն տարածելու հարցում մամուլի առանցքային դերը, դատապարտում է ցանկացած նման նախաձեռնություն, ներառյալ՝ Ալեն Սիմոնյանի առաջարկած՝ Քաղաքացիական օրենսգրքի համապատասխան հոդվածում փոփոխություն կատարելու նախագիծը, եւ կոչ է անում այն Ազգային ժողովի օրակարգ չմտցնել այն»:    

Լուրեր Հայաստանից - NEWS.am