Քերի Քավանո. Լեռնային Ղարաբաղի հակամարտությունը ռազմական լուծում չունի

ԵԱՀԿ Մինսկի խմբի 1999-2001 թվականներին ԱՄՆ նախկին համանախագահ Քերի Քավանոն «Ալ Ջազիրայի» համար գրել է «Լեռնային Ղարաբաղի հակամարտությունը ռազմական լուծում չունի» վերտառությամբ հոդված։

«Ներկայումս Հայաստանն ու Ադրբեջանը ռազմական գործողությունների կտրուկ էսկալացիայի սահմանին են, ինչը կհանգեցնի է՛լ ավելի մեծ մարդկային տառապանքի և օտարերկրյա տերությունների լուրջ ռազմական միջամտություն հրահրելու ռիսկի»,- նշել է նա։

Քվանոն շեշտել է, որ Ալիևը Թուրքիայի աջակցությամբ անցել է ռազմական լուծման՝ դիմադրելով մարտական գործողությունները դադարեցնելու և բանակցային սեղանի շուրջ վերադառնալու կոչերին։

Նրա խոսքով՝ հենց բանակցությունները, այլ ոչ թե ռազմական գործողությունները, հնարավորություն կտան խոսել կայուն կարգավորման մասին:

«Հայերի և ադրբեջանցիների միջև բանակցությունների հիման վրա խաղաղության հասնելու համար պահանջվում է 3 տարբեր բաղադրիչ՝ փոխզիջումային որոշումների ուղղությամբ աշխատելու առաջնորդների պատրաստակամությունը, նման կարգավորման համար միջազգային օգնությունն ու դրա հետագա իրականացումը, ինչպես նաև նման փոխզիջմանը բնակչությանը պատրաստելը»,- ասել է նա՝ հավելելով, որ խաղաղության հասնելու համար պետք է իրական փոխզիջում:

«Լեռնային Ղարաբաղի շուրջ վեճը կարգավորելը հեշտ չէ: Հայ և ադրբեջանցի առաջնորդների կողմից պահանջվում է քաղաքական խիզախություն, որպեսզի վերջ դրվի մարտական գործողություններին, սկսվեն կառուցողական, փոխշահավետ բանակցությունները, և որ երկու ժողովուրդները վստահ լինեն, որ նման մոտեցումը կարող է ապահովել խաղաղությունը, որին նրանք արժանի են»,- նշել է նա, տեղեկացնում է News.am-ը։