Ընտրակեղծիքների համար ստեղծված մեխանիզմներն իշխանություններն արդեն գործի են դրել, և մենք կարող ենք համարել, որ 2026 թվականի ընտրությունները կեղծված են Հակակոռուպցիոն ու Քննչական կոմիտեների կողմից։ Այս կառույցներն արդեն երկու ամիս է, ինչ իրենց բուն պարտականությունները կատարելու փոխարեն՝ բացահայտորեն սպասարկում են քաղաքական իշխանության նախընտրական քարոզչությունը։ Այս մասին հունիսի 4-ին լրագրողների հետ հանդիպման ժամանակ հայտարարել է փաստաբան Հովհաննես Խուդոյանը։
Նա հանրության ուշադրությունն է հրավիրել մի սկանդալային միջադեպի վրա․ քարոզարշավի ժամանակ իշխանություններին անհաճո քաղաքական հարցեր տված քաղաքացուն հրապարակայնորեն վիրավորել են ու տվել անբարո, ցինիկ մի հարց՝ «ինչո՞ւ չեք զոհվել»։ Փաստաբանն ընդգծել է, որ այս փաստը գտնվում է քաղաքական քննադատության և իրավական հարթության հատման կետում՝ ակնառու ձևով ցույց տալով, թե ինչպես է վարչապետն իրեն թույլ տալիս հանդես գալ ուղղակի սպառնալիքներով ու դրսևորել բացահայտ խուլիգանական վարքագիծ, ինչին իրավապահ համակարգն ու Կենտրոնական ընտրական հանձնաժողովը նախընտրում են ընդհանրապես չարձագանքել։ Խուդոյանը մանրամասն անդրադարձել է նաև քննչական մարմինների մանիպուլյատիվ գործելաոճին՝ նշելով, որ ընդդիմությանը վարկաբեկելու նպատակաուղղված արշավ է իրականացվում։ Նա պարզաբանել է, որ քրեական դատավարության օրենսդրությունը չի պահանջում հանցագործությունների մասին իրազեկելիս նշել գործով անցնող անձանց կուսակցական պատկանելությունը, մինչդեռ գերատեսչությունները միտումնավոր երկակի ստանդարտներ են կիրառում։
Ասվածն ավելի ակնառու դարձնելու համար փաստաբանը բերել է Քննչական կոմիտեի պաշտոնական հաղորդագրությունների օրինակը․ երբ քննվում է ընդդիմադիր դաշինքի համակիրներին առնչվող որևէ գործ, հենց վերնագրում ընդգծվում է նրանց կուսակցական պատկանելությունը, սակայն երբ նույն կուսակցության անդամները դաժան ծեծի են ենթարկվում, համանման հաղորդագրությունը հրապարակվում է առանց որևէ անձի կամ քաղաքական կոնտեքստի հիշատակման։ Հովհաննես Խուդոյանի խոսքով՝ սա ապացուցում է, որ այս կառույցներն ամբողջությամբ ներգրավված են իշխանությունների քաղաքական օրակարգի առաջմղման, այլ ոչ թե հանցագործությունների իրական բացահայտման գործում։ «Քննչական մարմինները կոպիտ կերպով մոնտաժում են հրապարակվող ձայնագրությունները՝ միտումնավոր թողնելով անձնական վիրավորանքներն ու հայհոյանքները, որոնք բացարձակապես որևէ կապ չունեն հանցակազմի հետ։ Դա արվում է սոսկ մեկ նպատակով՝ հեղինակության հարված հասցնել ընդդիմադիր ուժերին»,- ընդգծել է փաստաբանը։
Նա պարզաբանել է, որ հրապարակված նյութերում իրավապահները միտումնավոր պահպանում և տարածում են կոնտեքստից կտրված կտրուկ արտահայտություններ (օրինակ՝ արված ղարաբաղցիների հասցեին)՝ հասարակության մեջ արհեստական պառակտում հրահրելու համար։ Խուդոյանը հավելել է, որ այս քարոզչական թեզերն այնուհետև սինքրոն կերպով շրջանառության մեջ են դրվում երկրի բարձրագույն ղեկավարության կողմից և օգտագործվում նախընտրական ելույթներում՝ ընդդիմախոսներին վարկաբեկելու նպատակով։ Ամփոփելով խոսքը՝ Հովհաննես Խուդոյանը հայտարարել է, որ այս մանիպուլյացիաներն արդեն իսկ ուղղակի բացասական ազդեցություն են ունեցել ընտրությունների արդյունքների վրա՝ խեղաթյուրելով ընտրողների օբյեկտիվ ընկալումը, ինչի կապակցությամբ իրավական խումբը մանրամասն ու փաստարկված զեկույց է պատրաստում ուժային կառույցների կողմից արձանագրված խախտումների վերաբերյալ։
News.am
