ԱՄՆ նախագահ Դոնալդ Թրամփը չորեքշաբթի հայտարարել է, որ Միացյալ Նահանգները պատրաստվում է արդեն գիշերը նոր հարվածներ հասցնել Իրանին՝ մի քանի ժամ անց այն բանից հետո, երբ հայտարարել էր հրադադարի ժամանակավոր ռեժիմի դադարեցման մասին, հաղորդում է Associated Press-ը։
Նրա խոսքով՝ որոշումը կապված է Պարսից ծոցի երկրների տարածքում ամերիկյան ռազմական օբյեկտների վրա Իրանի վերջին հարձակումների, ինչպես նաև Հորմուզի նեղուցում առևտրային նավագնացության վրա կատարված հարձակումների հետ։
Անկարայում ՆԱՏՕ-ի գագաթնաժողովի շրջանակում ելույթ ունենալով՝ Թրամփը հայտարարել է, որ ամերիկյան ուժերը նախօրեին «շատ ուժեղ հարվածներ են հասցրել» իրանական թիրախներին և, հավանաբար, նոր հարվածներ կհասցնեն։
Նա Թեհրանին մեղադրել է քաղաքացիական նավերի վրա հարձակումների համար անօդաչու թռչող սարքեր և հրթիռներ կիրառելու մեջ՝ ընդգծելով, որ ԱՄՆ գործողությունները պատասխան քայլեր են։
Պատասխանելով հրադադարի հեռանկարների վերաբերյալ հարցին՝ Թրամփը հայտարարել է, որ, իր կարծիքով, զինադադարը «փաստացի ավարտվել է»։
Ավելի վաղ նա նշել էր, որ ամերիկյան ներկայացուցիչները կարող են շարունակել բանակցությունները Իրանի հետ, սակայն կասկած էր հայտնել դրանց արդյունավետության վերաբերյալ՝ հայտարարելով, որ հետագա բանակցությունները ժամանակի անիմաստ կորուստ է համարում։
ԱՄՆ կենտրոնական հրամանատարությունը հայտնել է, որ վերջին հարվածների ընթացքում խոցվել են Իրանի հակաօդային պաշտպանության համակարգերը, ռադիոլոկացիոն կայանները և Իսլամական հեղափոխության պահապանների կորպուսի ավելի քան 60 նավակներ, որոնք, Վաշինգտոնի պնդմամբ, օգտագործվել են Հորմուզի նեղուցում նավերի վրա հարձակումների համար։ Պենտագոնում հայտարարել են, որ գործողությունն ուղղված էր միջազգային նավագնացության դեմ նոր հարձակումների կանխմանը։
Ի պատասխան՝ Իրանը հարվածներ է հասցրել Բահրեյնում և Քուվեյթում ամերիկյան ռազմական օբյեկտներին։ Քուվեյթի իշխանությունները հայտնել են երկու բալիստիկ հրթիռի և 13 անօդաչու թռչող սարքի վնասազերծման մասին, սակայն բեկորների անկումը վնասել է էլեկտրահաղորդման մի քանի գծեր։ Իրանի պետական լրատվամիջոցները նաև հայտնել են երկրի մի շարք շրջաններում պայթյունների մասին՝ ամերիկյան հարվածներից հետո։
Էսկալացիայի նոր փուլը ուժեղացրել է մտավախությունները լայնածավալ հակամարտության վերսկսման և Հորմուզի նեղուցով նավագնացության հնարավոր խափանումների վերաբերյալ, որով անցնում է համաշխարհային նավթի և հեղուկացված բնական գազի մատակարարումների զգալի մասը։
News.am
