Օմանն Իրանին առաջարկել է Հորմուզի նեղուցի նկատմամբ խմբային վերահսկողության տարածաշրջանային մեխանիզմ ստեղծել՝ կամավոր մասհանումների համակարգով։ Այս մասին հայտնել է Reuters-ը՝ հղում անելով տարածաշրջանում իր աղբյուրներին։
Գործակալության զրուցակիցը հայտնել է, որ Օմանի առաջարկը, որն աջակցություն է ստացել տարածաշրջանում, բացառում է Իրանի միանձնյա վերահսկողությունը ռազմավարական նեղուցի նկատմամբ։ Հիմքում Մալակայի նեղուցի փորձն է, որտեղ ծովային ուղին օգտագործող նավերը կամավոր ֆինանսավորում են նավագնացությունը, բնապահպանական պաշտպանությունը և որոնողափրկարարական գործողությունները։
Bloomberg-ը, հղում անելով իր աղբյուրներին, գրել էր, որ անցած հանգստյան օրերին Օմանի և Իրանի բանակցություններում առաջարկ է հնչել վերաբացել Հորմուզի նեղուցի այսպես կոչված միջին միջանցքը։ Փետրվարի վերջից, երբ սկսվեցին ռազմական գործողությունները, նավերը հիմնականում շրջանցում են միջին միջանցքը՝ շարժվելով կա՛մ իրանական ափի մոտ գտնվող հյուսիսային ծովուղով, կա՛մ հարավայինով՝ Օմանի Մուսանդամ էքսկլավի մոտակայքով։
Bloomberg-ի աղբյուրները պնդում են, որ օմանյան կողմը լավատեսորեն է նայում Իրանի հետ գործարքի հեռանկարներին և հույս ունի արդեն առաջիկա օրերին հայտարարել առաջընթացի մասին, թեև երաշխիքներ դեռևս չկան։ Հորմուզի նեղուցի ճակատագրի շուրջ Իրանի և Օմանի հաջող բանակցությունները կարող են օգնել վերսկսելու ԱՄՆ-ի և Իրանի միջև հրադադարի շուրջ բանակցությունները։
Ավելի վաղ ԱՄՆ–ն կանգնեցրել էր Իրանի դեմ օդային հարվածները, ինչը դիվանագիտական լուծման հույս է տալիս, որը թույլ կտա վերսկսել նավագնացությունը Հորմուզի նեղուցում։
Sputnik Արմենիա
