Օգոստոսի 20-ին կառավարության դիմաց ակցիայի ժամանակ ոստիկանին ապտակած քաղաքացին ձերբակալվել է, Armenia Today-ը տեղեկացել է Քննչական կոմիտեից։
«Պաշտոնատար անձի օրինական ծառայողական գործունեությանը միջամտելու դեպքի առթիվ նախաձեռնվել է քրեական վարույթ»,- հավելել են ՔԿ-ից։
Կառավարության դիմաց երեկ ակցիա էին իրականացրել Վարդաշենի վթարային հանրակացարանների բնակիչները՝ պահանջելով իշխանությունների առաջարկած դրամական փոխհատուցման փոխարեն իրենց բնակարան տրամադրել։ Ակցիայի մասնակիցները նշել էին, որ իրենց առաջարկվող 7-9 մլն դրամով Երևանում այլ բնակարան ձեռք բերել հնարավոր չէ։
ԶԼՄ-ներում ավելի ուշ տեսանյութ էր հրապարակվել, ուր երևում է, թե ինչպես է քաղաքացին զրուցում ոստիկանների հետ, բայց ինչ-որ պահի հունից դուրս գալով՝ ապտակում նրանցից մեկին։ Թե ինչի շուրջ էր խոսակցությունը, տեսանյութում չի լսվում։
