Թուրքիայի հարավ-արևմտյան Մուղլա նահանգում շարունակվում է պայքարը մի շարք անտառային հրդեհների դեմ։ Բռնկումներ են գրանցվել տարածաշրջանի միանգամից մի քանի շրջաններում, ներառյալ Միլասը, Ֆեթհիեն, Մենթեշեն, Քավաքլըդերեն և Օրթաջան, հայտնում է Habertürk-ը։
Ամենաբարդ տեղամասերից մեկը դարձել է Միլասի շրջանը, որտեղ Գյուրչամլար և Քազըքլը-Բոզբյուք բնակավայրերի մոտակայքում հրդեհն արագորեն տարածվել է ուժեղ քամու պատճառով։ Դեպքի վայր են ուղարկվել անտառային ծառայության ստորաբաժանումներ և հրշեջ հաշվարկներ։
Ֆեթհիեի շրջանում կրակն առաջացել է Գյոքչեովադըքի մերձակայքում և տարածվել դեպի Ինլիջե։ Հրդեհի դեմ պայքարելու համար գործի են դրվել ցամաքային ստորաբաժանումներ, ուղղաթիռներ և հրշեջ ավիացիա։ Որոշ շրջաններում բնակիչներին ստիպված են եղել ժամանակավորապես տարհանել։
Եվս մեկ բռնկում է տեղի ունեցել Մենթեշեի շրջանում, որտեղ կրակը գյուղատնտեսական տարածքներից անցել է անտառային զանգված։ Մարման աշխատանքներին ներգրավվել են ինքնաթիռներ, ուղղաթիռներ, հրշեջ տեխնիկա և արտակարգ ծառայությունների աշխատակիցներ։
Իշխանությունները նշում են, որ կրակի տարածմանը նպաստում են բարձր ջերմաստիճանը, չոր բուսականությունը և ուժեղ քամին։ Փրկարար ծառայությունները շարունակում են օջախների տեղայնացման աշխատանքները և վերահսկում են իրավիճակը տարածաշրջանում։
Մուղլան Թուրքիայի գլխավոր զբոսաշրջային շրջաններից մեկն է, որտեղ տեղակայված են հայտնի հանգստավայրեր Բոդրումը, Մարմարիսը և Ֆեթհիեն։ Ամառային շրջանում մարզը երաշտի և ծայրահեղ շոգի պատճառով պարբերաբար բախվում է անտառային հրդեհների սպառնալիքի հետ։
Բռնկումների պատճառները պարզվում են։ Իրավապահ մարմինները նաև ստուգում են հրդեհային անվտանգության կանոնների հնարավոր խախտումները։
News.am
