Շիրակի մարզում երեկ տեղացած կարկուտը գույքային մեծ վնասներ է հասցրել բնակիչներին։
Սոցցանցերում օգտատերերը տեսանյութեր և լուսանկարներ են հրապարակել, որոնցում երևում է, որ որոշ բնակավայրերում ձվի մեծության կարկուտ է տեղացել։ «Գալա» TV–ի հրապարակած տեսագրություններում երևում են Գյումրիում վնասված մեքենաները։
Շիրակի մարզպետի աշխատակազմից հայտնում են, որ երեկվանից սկսվել են կարկուտի հասցրած վնասների գնահատման աշխատանքները։
«Վնասների գույքագրում իրականացվում է յուրաքանչյուր համայնքում։ Շիրակի մարզային հանձնաժողովը, համագործակցելով համայնքային հանձնաժողովների հետ, ուսումնասիրելու և ճշտելու է վնասները։ Հաշվառվելու է նաև գյուղատնտեսական նշանակության հողատարածքներին և մշակաբույսերին պատճառված վնասը»,– ասված է հաղորդագրությունում։
Հիշեցնենք` Գյումրիում խոշոր կարկուտ էր տեղացել նաև հունիսի 10-ի լույս 11-ի գիշերը։
Sputnik Արմենիա
