Երևանում վերածնված Ստեփանակերտի Վահրամ Փափազյանի անվան դրամատիկական թատրոնը Համազգային թատրոնում այսօր ներկայացրել է «Ռուզան. Արցախի դուստրը» պատմական ներկայացումը։
Մուրացանի «Ռուզան» պիեսի հիման վրա բեմադրված ներկայացումը բեմադրել է թատրոնի տնօրեն և գեղարվեստական ղեկավար Ռուզան Խաչատրյանը։
Մուրացանի պիեսը նվիրված է 13-րդ դարի՝ թաթար-մոնղոլական ներխուժման դարաշրջանի իրադարձություններին։ Հայրենասիրության և ազատության համար պայքարի համատեքստում ներկայացվում է երիտասարդ արքայադուստր Ռուզանի հերոսական կերպարն ու անձնազոհությունը։ Դերը կատարում է թատրոնի դերասանուհի Շողեր Սարգսյանը՝ Գալյա Նովենցի անվան թատերական դպրոցի արցախյան ուսանողուհին։ Ներկայացմանը մասնակցում է ամբողջ թատերախումբը, ինչպես նաև հրավիրված դերասաններ։
«Համազգային թատրոնում ցուցադրվող ներկայացումը կլինի Ստեփանակերտի դրամատիկական թատրոնի մշտական խաղացանկում»,- ասել է Ռուզան Խաչատրյանը ներկայացումից հետո։
Ներկայացումը հովանավորվել է «ԴԻԱԼՈԳ» կազմակերպության կողմից։
Նշենք, որ Ստեփանակերտի դրամատիկական թատրոնի դեբյուտը երևանյան բեմում «Արցախյան սիրո պատմություն» ներկայացումն էր, որը բեմադրվել էր Ղարաբաղի բարբառով։
Sputnik Արմենիա
