ԱՇՈՏ ԽԱՉԱՏՐՅԱՆԻ ԲԱՑ ՆԱՄԱԿԸ ՓԱՇԻՆՅԱՆԻՆ

News.am-ը բաց նամակ է ստացել ռուսաստանցի հայտնի գործարար, հայազգի բարերար Աշոտ Խաչատրյանից՝ ուղղված ՀՀ վարչապետ Նիկոլ Փաշինյանին: Ներկայացնում ենք տեքստն ամբողջությամբ․

«Պարո՛ն Վարչապետ,

Այն, ինչ տեղի ունեցավ այս տարվա նոյեմբերի 9-ին, երբ զիջումների գնացիք Ադրբեջանի ղեկավարության հանդեպ, այն, որ Դուք թաքցրեցիք իրերի իրական վիճակը և ձեր դիրքորոշումը՝ չտեղեկացնելով ժողովրդին, դա դավաճանություն է, առանց բացառության՝ Հայաստանի և Լեռնային Ղարաբաղի բոլոր քաղաքացիների նկատմամբ: Նույնիսկ Հայրենական մեծ պատերազմի տարիներին, որքան էլ դժվար լիներ ճակատում, ճշմարտությունը ժողովրդին հասցվում էր ամբողջությամբ և ժամանակին:

Ձեր ստորագրած ժամանակավոր կարգավորումը այդպես էլ չլուծեց Լեռնային Ղարաբաղի խնդիրը ապագա ժամանակահատվածների համար: Այդ դեպքում ինչու՞ էր անհրաժեշտ զոհաբերել այդքան շատ երիտասարդների, իսկական հայրենասերների՝ անդառնալի վնաս հասցնելով Հայ ժողովրդի լավագույն գենոֆոնդին: Ձեր հրաժարականի որոշումը մերժելու վերջին արդարացման մեջ դուք նշում եք, թե դա կդիտարկվեր որպես դասալքություն, և նշում եք, որ չեք ցանկանում բարդ իրավիճակը բարդել մեկ այլ առաջնորդի վրա: Սա ևս մեկ անգամ ապացուցում է Ձեր ոչ ճիշտ, վնասակար դիրքորոշումը և «վատ խաղում լավ արկ» պահելու ձեր ցանկությունը`փոխանակ մեր պետության և ընդհանրապես հայության մասին մտածելու և նրա շահերը պաշտպանելու:

Ես մոտ 30 տարի Ռուսաստանի քաղաքացի եմ, բայց հայրենի Հայաստանը և հայրենի Արցախը, որը զենքը ձեռքիս պաշտպանել եմ եղբայրներիս հետ, ես չեմ թողել իմ կամքով, այլ ստիպված եմ եղել դա անել 90-ականների սկզբին ղարաբաղյան հակամարտությունում Շահումյանի շրջանի առաջին նման դավաճանությունից հետո, և տեղափոխվել եմ Ռուսաստան, որն ապաստանել է մեզ: Այսօր մենք երախտապարտ ենք Ռուսաստանի Դաշնությանը և նրա խաղաղապահ ուժերին, որոնք կարողացան կասեցնել Լեռնային Ղարաբաղում մեր Հայ ժողովրդի կրկնվող ցեղասպանությունը: Մեր մարդիկ կրկին դատապարտված են լքել իրենց տները, հեռանալ հայրական հողերից, որոնք վաղուց հարազատ են դարձել մեզ:

Աջակցելով Հայաստանի Հանրապետության օրինական իշխանությանը՝ մենք, որպես գլխավոր հրամանատարի, որպես երկրի վարչապետի և երկրի գլխավոր գործադիր մարմնի, Ձեզ ենք հանձնել, պարոն Փաշինյան, ժողովրդի և Հայաստան հնագույն պետությանը ճակատագիրը: Մենք կարծում էինք, որ Դուք ստեղծում եք Հայերի փառավոր պատմություն՝ հիմնված հազարամյա քրիստոնեական հավատքի վրա: Բայց իրականում Դուք ստեղծեցիք ամոթ հայ ժողովրդի համար, որը պատմությունն ու ժողովուրդը երբեք չեն մոռանա: Որպես էթնիկ հայ, որը 70 տարի իր պատիվը չի արատավորել, ես ամաչում եմ, որ իմ սիրելի Հայաստանի ղեկավարը Դուք եք և ձեր դիրքորոշմանը կողքից եք նայում՝ արդյո՞ք ես լավ եմ ներկայանում այսքան անհրապույր իրավիճակում:

Ավելի քան երկու տարի Դուք գերագույն գլխավոր հրամանատար եք և գործնականում ոչինչ չեք արել երկրի պաշտպանունակության ամրապնդման համար, այլ միայն հեռացրել եք արժանի զինվորական ղեկավարներին՝ գլխատելով Հայկական բանակի հրամանատարական կազմը: Ձեր կողմից արված Հայաստանի լավագույն որդիների այդպիսի զոհաբերությունների դեպքում հրաժարականի փոխարեն ես քաջություն կհավաքեի և փամփուշտ կարձակեի ճակատիս՝ դրանով ներողություն խնդրելով հայրերից և մայրերից, կանանցից և քույրերից, որոնք անիմաստ կորցրել են իրենց տղամարդկանց: Ինչո՞ւ նրանք իրենց զոհեցին՝ որպեսզի հայ ժողովրդի վիշտը խորանա՞, և Ադրբեջանի ղեկավարությունը շարունակի իր «անօրինականությունը»` ոտնատակ տալով Լեռնային Ղարաբաղի հայկական պատմամշակութային ժառանգությո՞ւնը:

Դուք հոգով չեք ցավում ձեր ժողովրդի և ձեր Հայրենիքի համար, որը երբեք ծնկի չի եկել ոչ մեկի առաջ:

Համարձակություն գտեք ընդունելու ձեր դավաճանությունը Հայ ժողովրդի և Արցախի բնակչության նկատմամբ, որին հասցրել եք ներկայիս ճգնաժամային, ամոթալի ու հուսահատ վիճակին։ Հեռացեք ձեր պաշտոնից՝ հանձնելով այն ժողովրդի կողմից ընտրված նոր առաջնորդի հուսալի ձեռքը: Ռուսաստանի Դաշնության խաղաղապահ ուժերի օժանդակությամբ, հուսով եմ, այս անհարկի պատերազմը, որ նպատակային հրահրվել է Հայաստանի արտաքին թշնամիների կողմից, վերջնականապես կդադարեցվի: Արդար հայ ժողովուրդը արժանի է հազարավոր տարիներ խաղաղ ապրելու իր հայրենի հողերում՝ հնարավորինս օգտակար լինելով ամբողջ համաշխարհային հանրությանը:

Պարոն Վարչապետ, հեռացեք խաղաղությամբ, և բոլոր հայերը ճիշտ կգնահատեն ձեր արարքը:

Ձեր ժողովրդի հանդեպ հարգանքով, արժանապատվությամբ և պատվով»:

News.am