Պետրոսյան. Եթե Մինասյանն իրավացի է, ապա Միրզոյանի նկատմամբ պետք է քրեական գործ հարուցվի

Եթե Միքայել Մինասյանի հայտարարությունները ճիշտ են, ապ ԱԺ խոսնակ Արարատ Միրզոյանի նկատմամբ պետք է քրեական գործ հարուցվի: Այս մասին լրագրողների հետ հանդիպման ժամանակ ասաց ՀՀ քննչական կոմիտեի վերահսկողության գլխավոր վարչության նախկին պետ, արդարադատության գեներալ-մայոր Թաթուլ Պետրոսյանը:

Նրա խոսքով՝ դատախազությունը պետք է միանգամից քրեական գործ հարուցեր ՀՀ ՔՕ 299-րդ հոդվածով (պետական դավաճանություն):

Նա զարմանք հայտնեց, որ ԱԱԾ-ն հերքել է տեղեկությունը՝ հայտարարելով, որ Միրզոյանն իրենց գործակալը չէ:

«Այդ տրամաբանությամբ ցանկացած մարդու վերաբերյալ կարելի է հարցում ուղարկել, և ԱԱԾ-ն պետք է պատասխանի, թե արդյոք նա գործակալ է, թե ոչ: Ինչ վերաբերում է խորհրդարանի խոսնակին, ապա եթե նա գործակալ չէ, ի՞նչ իմաստ ունի ծառայողական ստուգում անցկացնել: Դա փորձ է՝ պարզելու, թե որտեղից է եղել տեղեկության արտահոսքը: Եթե Մինասյանն իրավացի է, ապա Միրզոյանի դեպքում խոսքն արտահաստիքային գործակալի մասին է, ով բյուջեից գումար է ստանում յուրաքանչյուր փոխանցված տեղեկության համար: Դրանք մարդիկ են, ովքեր անցյալում որևէ հանցանք են գործել և համաձայնել են համագործակցության: Արտահաստիքային գործակալը կարող է նաև պաշտոնյա լինել»,-հավելեց Պետրոսյանը, տեղեկացնում է News.am-ը:

Նա նկատեց, որ զարմանալի է, որ այդ մարդը զբաղվել է Հայոց ցեղասպանության հարցերով և ենթադրաբար երկրի գործակալ է, որն այն իրագործել է, ավելին, զարմանալի է նաև այդ ամենի հանդեպ հանրության անտարբերության մթնոլորտը: