Հայաստանը Վրաստանի և ԱԳ այլ երկրների հետ միասին պատվաստման համար գումար կստանա

Եվրահանձնաժողովը 40 միլիոն եվրոյով ավելացրել է Արևելյան գործընկերության վեց երկրների օգնության չափը՝ հասցնելով այն մինչև 75 միլիոն եվրո կորոնավիրուսի դեմ պայքարի համար, ասված է ԵՄ ներկայացուցչության հաղորդագրության մեջ, փոխանցում է sputnik-georgia-ն:

Ներկայացուցչության տեղեկատվության համաձայն՝ կորոնավիրուսի դեմ պատվաստումների և պատվաստման գործընթացի արագացման համար 35 միլիոնով ավելացած ֆինանսական աջակցությունը կստանան Ադրբեջանը, Հայաստանը, Բելառուսը, Վրաստանը, Մոլդովան և Ուկրաինան:

«ԵՄ-ն վճռական է աջակցելու մեր արևելյան հարևաններին պատվաստումների արագացման հարցում, քանի որ դա վճռորոշ նշանակություն կունենա համաճարակի դադարեցման և տարածաշրջանի սոցիալ-տնտեսական վերականգնման մեկնարկի համար», – հայտարարել է հարևանության և ընդլայնման հարցերով եվրահանձնակատար Օլիվեր Վարհեյը:

Հատկացված 35 միլիոնը՝ 40 միլիոն եվրո արժողությամբ առաջին աջակցության փաթեթի լրացումն է, որը մեկնարկել է փետրվարին՝ Առողջապահության համաշխարհային կազմակերպության հետ համագործակցությամբ բնակչության անվտանգ և արդյունավետ պատվաստումների համար երկրների պատրաստվածության անհապաղ բարձրացման համար:

ԵՄ-ի աջակցությունը ներառում է պատվաստումների քարոզարշավին ներգրավված առողջապահական մենեջերների և բժշկական անձնակազմի ուսուցում, պատվաստանյութերի և ծախսային նյութերի առաքում և բուժման առանցքային նյութատեխնիկական աջակցություն, պատվաստումների վերաբերյալ տվյալներ և անվտանգության մոնիտորինգ, հաղորդակցություն և հասարակայնության հետ փոխադարձ կապ, ինչպես նաև աջակցություն COVID անձնագրերի մշակման գործում, տեղեկացնում է Verelq.am-ը: