Պատգամավոր Աննա Մկրտչյանի հայրը Քասախ համայնքին միլիոնների վնաս է պատճառել

Ոստիկանությունում հարուցված քրեական գործն ուղարկվել է ՀՀ քննչական կոմիտե՝ նախաքննության:

Կոտայքի մարզի Քասախ համայնքին պատճառվել է ավելի քան 41 միլիոն դրամի վնաս։ Տեղեկությունը հայտնում է ՀՀ ոստիկանության մամուլի ծառայությունը։

Մասնավորապես, Քասախ համայնքի ղեկավարը նախապես պայմանավորվել է մի քաղաքացու հետ` Քասախում ընդհանուր 9600 քմ մակերեսով հողատարածքը մեկ քառակուսի մետրը 15 դոլարով ձեռք բերելու վերաբերյալ:

Դիտավորյալ աճուրդներ չեն կազմակերպվել, հետո փաստացի չկայացած աճուրդների վերաբերյալ կազմվել են իրավաբանական նշանակություն ունեցող, իրադարձություններ հավաստող արձանագրություններ, որի հետևանքով համայնքային սեփականություն հանդիսացող՝ 9600 քմ մակերեսով հողատարածքների վաճառքը ձևակերպել են մեկ քառակուսի մետրը ընդամենը 2900 դրամով՝ ընդհանուր 28 միլիոն դրամով: Այդ կերպ նրանք յուրացրել են գնորդի կողմից կանխիկ եղանակով իրենց վստահված 59 միլիոն դրամից առանձնապես խոշոր չափերի` 31 միլիոն դրամը։

Կիրառելով նույն մեխանիզմը, Քասախի համայնքային սեփականություն հանդիսացող՝ 800 քմ մակերեսով հողատարածքը համայնքապետարանի աշխատակազմի գլխավոր մասնագետին օտարվել է մոտ երկուսուկես միլիոն դրամով, իսկ վերջինս էլ, այն բաժանելով երկու մասի, դրանք վաճառել է չորս միլիոն և ութ միլիոն 730 հազար դրամով, ինչի հետևանքով համայնքին պատճառվել է 10 միլիոն դրամի վնաս:

Դեպքերի առթիվ քրեական ոստիկանության կոռուպցիոն և տնտեսական հանցագործությունների դեմ պայքարի վարչությունում հարուցվել է քրեական գործ, որն ուղարկվել է քննչական կոմիտե՝ նախաքննություն կատարելու համար:

Ի դեպ, Քասախի համայնքապետը ԱԺ «Պատիվ ունեմ» խմբակցության պատգամավոր Աննա Մկրտչյանի հայրն է` Արա Մկրտչյանը, տեղեկացնում է Sputnik Armenia-ն։