Սևերոդոնեցկում հայկական խաչքար է տեղադրվել և օծվել

Սևերոդոնեցկում (Լուգանսկի շրջան) տեղադրվել և օծվել է հայկական խաչքար՝ նվիրված ուկրաինացի և հայ ժողովուրդների անմեղ զոհերին, հայտնել է AnalitikaUA.net-ը։

Միջոցառմանը ներկա են եղել Ուկրաինայի հայերի միության փոխնախագահ Դավիթ Մկրտչյանը, տեղական իշխանությունների ներկայացուցիչներ, հոգևորականներ, ինչպես նաև հյուրեր հայկական համայնքներից։

«Այսօր և այժմ նշանակալից իրադարձություն է երկու ազգերի, հենց ինձ և ձեզ համար. մեր ժողովուրդներն ունեն հազարամյա պատմություն, բայց մենք ինքներս ենք գրում ժամանակակից պատմությունը, միասին, այստեղ՝ Լուգանսկի մարզում, Ուկրաինայի համար ամենադժվար պահին, երբ պատերազմ է ընթանում: Ձեր խոսքերը մեր բարեկամության, հայերի և ուկրաինացիների մասին մեզ համար շատ կարևոր են։ Բոլորը գիտեն, որ հեշտ է ընկերանալ, երբ խնդիրներ չկան, սակայն Լուգանսկի շրջանի և ամբողջ երկրի համար այդքան դժվար ժամանակներում հասկանում ենք, թե ինչ են նշանակում ձեր խոսքերը և օգնության մեկնած ձեռքը: Եվ մենք հասկանում ենք նման ընկերության իրական արժեքը, անկեղծորեն շնորհակալ եմ ձեզ դրա համար: Մենք չենք կարող փոխել անցյալը, սակայն միասին մենք կգրենք նոր պատմություն, որը չեն ցանկանա փոխել, այլ միայն հպարտանալ ընդհանուր ձեռքբերումներով և հաղթանակներով»,- բացման արարողության ժամանակ հայտարարել է Լուգանսկի շրջանային վարչակազմի ղեկավար Սերգեյ Գայդայը։

Հնագույն ավանդույթի համաձայն՝ հայկական հուշահամալիրի խաչքարը օծել է Հայ առաքելական եկեղեցու Ուկրաինայի թեմի առաջնորդ Մարկոս ​​եպիսկոպոս Հովհաննիսյանը, տեղեկացնում է News.am-ը։