TALK TIME. ՀՀ իշխանությունները ցանկանում են լեգիտիմացնել իրենց գործողությունները (ՏԵՍԱՆՅՈՒԹ)

Նույնիսկ ընդդիմության մասնակցությունը չէր բերում որևէ երաշխիք, որ հնարավոր էր քննիչ հանձնաժողովի միջոցով բացահայտել ողջ ճշմարտությունը, որ տեղի է ունեցել 44-օրյա պատերազմի ընթացքում։ Այդ մասին TALK TIME հաղորդման ժամանակ հայտարարել է News.am-ի կողմից հյուրնկալված «Հայաստան» ընդդիմադիր դաշինքի պատգամավոր Էլինար Վարդանյանը։

Նրա խոսքով՝ ստացվում է մի իրավիճակ, երբ իշխող խմբակցությունը, ում ձևավորած իշխանությունը հենց պատասխանատու է 44-օրյա պատերազմի համար, փորձում է քննել հենց 44-օրյա պատերազմի հանգամանքները։

«Սա բերելու է մի ֆարսի, որը, ըստ էության, լեգիտիմացնելու է, օրինականացնելու է այն ողջ գործողությունները, որ իշխանություններն արել են 44-օրյա պատերազմի ժամանակ։ Մենք գիտենք, որ Փաշինյանը և հենց իշխանությունը փնտրում են մեղավորներ։ Այսինքն նրանց համար 44-օրյա պատերազմում մեղավոր են բոլորը, բացի իրենցից։ Հիմա ո՞նց եք պատկերացնում, այս հանձնաժողովը արդյո՞ք բացահայտելու է իրականությունը, ինչ եղել է իրականում», - ասել է նա։

Պատգամավորը նաև նշել է, որ նորաստեղծ հանձնաժողովը պետք է քննարկի և քննի բազմաթիվ հարցեր:

«Եվ օրինակ այս հանձնաժողովը բացահայտելու՞ է, թե ինչպես եղավ, որ հոկտեմբերի 19-ին, երբ պատերազմը կանգնեցմելու առաջարկ էր եղել , պատերազմը այդպես էլ չդադարեցվեց։ Այս հանձ․ պատասխան տալու՞ է, թե ինչպես է եղել, որ շուրջ 7000 վարձկաններ, ինչպես հենց հայտարարում են իրենք, հայտնվել էր արդեն Ադրբեջանի տարածքում և մենք, մեր Ազգային անվտանգության ծառայությունը, մեր իրավապահները, մեր իշխանությունները այդ մասին չգիտեին կամ գիտեին և լռում էին։ Արդյո՞ք այդ հանձնաժողովը տալու է պատասխաններ, թե մեր Անվտանգության խորհուրդը ինչ էր անում այդ ընթացքում, նիստերի ընթացքում ինչ էր քննարկում և այլն», - ասել է պատգամավորը։