ՄԻՊ Գրիգորյանը շրջանցեց Փաշինյանի ԱԺ-ում խոսելաոճի վերաբերյալ հարցը (ՏԵՍԱՆՅՈՒԹ)

Անվտանգային հարցերում մարդու իրավունքների մոտեցումներն ամրապնդելու հետևողական աշխատանքը պետք է շարունակվի: Այս մասին, այսօր՝ մարտի 3-ին, կառավարության նիստից հետո լրագրողների հետ զրույցում նշեց մարդու իրավունքների նոր պաշտպան Քրիստինե Գրիգորյանը:

«Դրան գումարած պատերազմի հետևանքով հումանիտար հետևանքներ վերացման ընթացքում գերիների, պահվող այլ քաղաքացիական անձանց վերադարձի, հայրենադարձման հետ կապված Ադրբեջանի իշխանությունների կողմից իրականացված խախտումները միջազգային կառույցներին ներկայացնեռլու հարցերն են լինելու իմ ուղենշում: Երկրորդ մեծ խումբը ատելության խոսքի հետ կապված լուծումներ գտնելն է՝ օգտագործելով ՄԻՊ-ի յուրահատուկ մանդատը:

Ատելության խոսքի հետ կապված երկրորդ կարևոր ենթաշերտը ադրբեջանական և թուրքական իշխանությունների կողմից հայատյացության քարոզի, քաղաքականությաւն ապացույցները, փաստերը հավաքելը, հիմնավորելը և միջազգային իրավասու մարմիններին ներկայացնելն է»,-ասաց նա:

Դիտարկմանը, թե երեկ վարչապետ Նիկոլ Փաշինյանն ԱԺ-ում ձայնը բարձրացրել էր պատգամավորների վրա, մատ էր թափ տալիս, խոստանում էր էլի բաներ թափ տալ, ՄԻՊ-ը փորձե՞լ է իր գործիքակազմն օգտագործել, որ նա նման պահվածքով հանդես չգա, Գրիգորյանն ասաց. «Ընդհանրապես, մեր երկրում և ԱԺ-ում սուր է արտահայտվում քաղաքական բանավեճը: Երկուստեք քաղաքական բանավեճը շատ բևեռացված է, անթույլատրելի բառապաշար է օգտագործվում: Ես ինքս առաջարկել եմ և ատելության խոսքի հակազդմանն ուղղված իմ ջանքերի մեջ պատկերացրել եմ նաև քննարկումներ ԱԺ պատգամավորների, կառավարության ներկայացուցիչների մասնակցությամբ, որ մենք սահմանենք, օրինակ, կանոններ ԱԺ դահլիճում բառապաշարի հետ կապված: Այս առումով մենք հսկայական գործ ունենք անելու: Մենք ԱԺ-ում ունենք ծայրահեղ բևեռացված խոսք, որի դեմ պետք է պայքարենք», տեղեկացնում է News.am-ը: