Последние новости
2022-03-07 17:32

ՏԱՐԲԵՐ ՄԱՐԶԵՐՈՒՄ ՏԱՆ ՏԵՐ Է ԴԱՐՁԵԼ ԱՐՑԱԽԻՑ ՏԵՂԱՀԱՆՎԱԾ 15 ԸՆՏԱՆԻՔ

0
Telegram

Վիվա-ՄՏՍ-ը և «Ֆուլեր տնաշինական կենտրոնը» հնարավորինս աջակցում են պատերազմի հետևանքով անօթևան դարձած, Արցախից ժամանած և տարբեր մարզերում վարձակալությամբ բնակվող ընտանիքներին: 2021 թվականին, բնակարանաշինության ծրագրով տուն է կառուցվել տեղահանված 15 ընտանիքի համար: Շահառուների մյուս մասը սոցիալապես անապահով խմբից է:

Խաչատրյանների ընտանիքը Արցախից Վայոց Ձորի մարզի Ագարակաձոր գյուղ է տեղափոխվել 44-օրյա պատերազմից հետո: Ընտանիքի հայրը՝ Գևորգը, շտապ օգնության վարորդ է եղել. հիշում է, թե ինչպես էր հրետակոծության տակ վիրավորներ տեղափոխում՝ մտածելով կռվի դաշտում գտնվող կրտսեր որդու՝ Գուրգենի մասին: Պատերազմի ավարտից հետո, թիկունքում թողնելով տարիների ստեղծած տուն-տեղը, այգին ու փոքրիկ ֆերման, Խաչատրյանները տեղափոխվել են Վայոց ձոր, գնել կաթացող տանիքով, հին ու խարխլված կիսակառույց մի շինություն:

Վիվա-ՄՏՍ-ի և «Ֆուլեր տնաշինական կենտրոնի» աջակցությամբ՝ ապրելու համար անհարմար շինությունը դարձել է բոլոր կոմունալ հարմարություններով ապահովված բնակելի տուն: Գործընկեր կազմակերպությունների ղեկավարներն այցելել են Խաչատրյաններին՝ նրանց հետ կիսելու բնակարանամուտի ուրախությունը:

«1999 թվականից ընտանիքս Նոր Հաջնից Քաշաթաղի շրջանի Քարեգահ գյուղ էր տեղափոխվել նոր կյանքի հույսով: Բոլորս աշխատում էինք, զուգահեռ հասցնում էինք նաև գյուղատնտեսությամբ, անասնապահությամբ զբաղվել: Պատերազմի պատճառով կորցրեցինք ամեն ինչ… Ծանր էր շատ, բայց ինչ կարող էինք՝ արեցինք: Հուսահատվելու իրավունք չունենք: Արդեն այստեղ՝ Ագարակաձորում, փոքր տղայիս ենք նշանել. նոր կյանքի էջ ենք սկսում», -ասել է ընտանիքի հայրը՝ Գևորգը:

Ընտանիքի ավագ որդին հիմա ոստիկանությունում է աշխատում, կրտսերը պատրաստվում է զինվորական դառնալ: Գևորգն ու կինն արդեն թոշակառուներ են, սակայն՝ դեռ ավյունով լի: Պատրաստ են ամեն ինչում օգնել, թև ու թիկունք լինել զավակներին:

«Տարիներ առաջ, մեր համագործակցության կարևորությունը ներկայացնելիս, ընդգծում էի, որ սա երկարաժամկետ ազդեցության ծրագիր է. այն ավարտվում է, սակայն դրական ազդեցությունը մնում է երկար տարիներ: Ամենատարբեր ընտանիքների հետ երկար տարիներ շփվելուց հետո, այժմ առավել ճիշտ բնորոշող արտահայտություն եմ ուզում անել. սա ապրեցնող ծրագիր է: Այն հուսադրող, մարդկանց մեջ հավատ արթնացնող կարևորագույն միջոց է: Երբ հեռավոր որևէ գյուղում իր հոգսերի հետ մենակ մնացած մարդն զգում է, որ հենարան ունի, հավատում է իր ուժերին, ջանքեր է գործադրում և արժանապատվորեն հաղթահարում է եղած խնդիրները: Սա կարևոր ցուցիչ է մեզ համար»,- ասել է Վիվա-ՄՏՍ-ի գլխավոր տնօրեն Ռալֆ Յիրիկյանը:

«2021 թվականի բնակարանաշինության ծրագրում Արցախից տեղափոխված ընտանիքները առաջնահերթության ցանկում էին: Վստահ եմ, որ այս ընտանիքը նորից կվերագտնի իր անդորրը, և տեղահանության դառը հիշողությունները կանցնեն պատմության գիրկը»,- ասել է «Ֆուլերն տնաշինական կենտրոնի» նախագահ Աշոտ Եղիազարյանը:

Հայաստանի տասը մարզում իրականացվող բնակարանաշինության ծրագրի շրջանակում, Վիվա-ՄՏՍ-ը կատարել է ավելի քան 230 մլն ՀՀ դրամի ներդրում, ինչի արդյունքում 2021 թվականին աջակցություն է ստացել 87 ընտանիք:

Վիվա-ՄՏՍ-ը (ՄՏՍ Հայաստան ՓԲԸ) Հայաստանի շարժական կապի առաջատար օպերատորն է, որն ունի ամենաընդարձակ ցանցը և տրամադրում է ձայնային և տվյալների փոխանցման ծառայությունների բազմազան տեսականի` Հայաստանի ամբողջ տարածքում: Գործունեության հիմք ընդունելով իր բաժանորդների շահերին լավագույնս ծառայելը՝ հիմնադրման օրվանից` 2005թ. հուլիսի 1-ից, Վիվա-ՄՏՍ-ը կարճ ժամանակամիջոցում կարողացել է ստեղծել համահանրապետական ցանց և բաժանորդների մեծ բազա: Վիվա-ՄՏՍ-ը նորարարությունների առաջատար է և հետամուտ է ոլորտի բոլոր զարգացումներին` ի շահ երկրի շարժական հեռահաղորդակցության շուկայի: Վիվա-ՄՏՍ-ը գործունեության մեջ առաջնորդվում է ISO 26000` Սոցիալական պատասխանատվության, ISO/IEC 27001:2013` Տեղեկատվական անվտանգության կառավարման համակարգի, ինչպես նաև ISO 37001` հակակոռուպցիոն և կաշառակերության կանխարգելմանն ուղղված միջազգային ստանդարտներով: Հավելյալ տեղեկություններ ստանալու համար այցելեք www.mts.am։

«Մոբիլնիյե Տելեսիստեմի» ՀԲԸ-ն (ՄՏՍ) Ռուսաստանում և ԱՊՀ երկրներում հեռահաղորդակցության խոշորագույն օպերատոր է: Դուստր ձեռնարկությունների հետ միասին կազմակերպությունը սպասարկում է 86.5 միլիոն բաժանորդի Ռուսաստանում, Հայաստանում և Բելառուսում: 2000թ-ի հունիսից «ՄՏՍ»-ի բաժնետոմսերը գնանշված են Նյու Յորքի բորսայում MBT ծածկագրի տակ: Հավելյալ տեղեկություններ ստանալու համար այցելեք www.mtsgsm.com։

Հայաստանի «Ֆուլեր Տնաշինական Կենտրոնը» բարեգործական հասարակական կազմակերպություն է, որն աջակցում է Հայաստանի և Արցախի հանրապետություններում ցածր եկամուտ ունեցող ընտանիքներին կառուցել և վերանորոգել պարզ, հարմարավետ և մատչելի տներ՝ տալով նրանց երկարաժամկետ, անտոկոս փոխառություններ, ինչպես նաև իրականացնում է տնազոhւրկների շահերի պաշտպանություն՝ դարձնելով այն խղճի հարց և գործելու մղում։ Ամենամսյա ետվճարներից կազմվում է շրջանառու ֆոնդ և օգտագործվում այլ ընտանիքներին աջակցելու նպատակով՝ այսպիսով դառնալով համայնքային զարգացման կայուն ֆինանսական հիմք։ Առ այսօր կազմակերպությունն աջակցել է մոտ 1300 ընտանիքների: Լրացուցիչ տեղեկությունների համար կարող եք այցելել՝ www.fcharmenia.org կամ գրել [email protected] էլ հասցեին:

Галерея (4 фото)

Основная тема:
Վիվա-ՄՏՍ

Теги:
Վիվա-ՄՏՍ

ПОСЛЕДНИЕ ОТ АВТОРА

ПОСЛЕДНЕЕ ПО ТЕМЕ