ԱՄՆ հետախուզական ծառայություններն ուկրաինական ճգնաժամի էսկալացիա են կանխատեսում

Ռուսաստանի նախագահ Վլադիմիր Պուտինի հայտարարությունը՝ իր միջուկային ուժերի պատրաստականության մակարդակը բարձրացնելու մասին, «շատ անսովոր» էր։ Այս մասին օրենսդիրներին ասել է ԱՄՆ Ազգային հետախուզության տնօրեն Ավրիլ Հեյնսը` նշելով, որ դա ավելի լավ է որպես ուղերձ ընկալել, այլ ոչ թե որպես Միացյալ Նահանգներին ուղղված անմիջական սպառնալիք, հայտնում է CNN-ը։

Նրա խոսքով՝ դա «արդյունավետ ուղերձ» էր՝ փորձելով հետ պահել ՆԱՏՕ-ին ուկրաինական հակամարտությանը միջամտելուց։ «Դա նրա հիմնական նպատակն էր»,- ասել է նա Ներկայացուցիչների պալատի հետախուզության հանձնաժողովում: Հեյնսը նաև նշել է, որ ռուսական ռազմավարական ուժերը «բարձր պատրաստականության» վիճակի բերելու մասին Ռուսաստանի հայտարարությունը չի վերաբերում «տեխնիկական տերմինին, ինչպես մենք դա հասկանում ենք նրանց համակարգում»: Նա նշել է, որ հետախուզական հանրությունը ուշադիր հետևել է Ռուսաստանի ցանկացած ռազմավարական քայլին, սակայն «այս փուլում մենք չենք տեսնում ոչինչ, որը ցույց կտար, որ նա անում է ինչ-որ այլ բան, քան մենք տեսել ենք անցյալում»:

«Մեր վերլուծաբանները կարծում են, որ դժվար թե Պուտինին անհաջողությունները կանգնեցնեն, և նա կարող է էսկալացիայի գնալ»,- ասել է նա: Այսքան բարձր լարվածության դեպքում միշտ «չկանխամտածված էսկալացիայի» հավանականություն կա»,- ասել է Հեյնսը:

Կենտրոնական հետախուզական վարչության տնօրեն Ուիլյամ Բերնսը համաձայնել է, որ Ռուսաստանը դժվար թե նահանջի: «Կարծում եմ՝ Պուտինն այժմ զայրացած և վրդովված է։ Նա, հավանաբար, կկրկնապատկի խաղադրույքը և կփորձի ջախջախել ուկրաինական բանակը՝ ուշադրություն չդարձնելով քաղաքացիական բնակչության շրջանում զոհերի թվին»,- ասել է Բերնսը: Նրա խոսքով՝ ԱՄՆ-ը ակտիվորեն հետախուզական տեղեկություններ է փոխանակում Ուկրաինայի հետ, տեղեկացնում է News.am-ը։