ՀՀ ՄԻՊ․ Ադրբեջանում հայատյացության քարոզը ֆաշիստական դրսևորումների է հանգեցնում

Բազմաթիվ զեկույցներով, միջազգային փաստահավաք թղթերով, ՀՀ և ԱՀ ՄԻՊ-երի բազմաթիվ զեկույցներով և գրականությամբ ապացուցվում է, որ ադրբեջանական պետության կողմից հայի նկատմամբ էթնիկ ատելության քաղաքականությունն ունի սիստեմատիկ բնույթ։

Այս մասին այսօր առցանց քննարկման ժամանակ արձանագրեց ՀՀ ՄԻՊ Քրիստիննե Գրիգորյանը ՝ նշելով, որ դրանով կերակրվում է ադրբեջանական հասարակությունը և այս հանգամանքն է հանգեցրել մի քանի պատերազմների այս ընթացքում։

ՀՀ ՄԻՊ-ն այս համատեքստում ընդգծեց հատկապես 2020 թվականի սեպտեմբերին սանձազերծված պատերազմը, որն ընդգծված ուղղորդվեց ատելության քարոզով։

«Պետական հովանավորչությամբ հայերի նկատմամբ ատելության քարոզն իրականում շատ վտանգավոր և նույնիսկ ֆաշիստական դրսևորում է»,-ասաց Քրիստիննե Գրիգորյանը՝ շեշտելով, որ ուսումնասիրությունները վկայում են, որ այս քարոզ- քաղաքականությունը երկու հենասյունի վրա է հենվում՝ էթնիկ և կրոնական։

ԱՀ ՄԻՊ Գեղամ Ստեփանյանն էլ նշեց, որ այդ քաղաքականությունը հետապնդում է կոնկրետ նպատակ։

«Դա ինքնանպատակ չի արվում, այլ իր առջև ունի դրած խնդիր։ Եվ այդ խնդիրը հետզհետե լուծելու ճանապարհով է շարժվում Ադրբեջանը, և այդ նպատակն առաջին հերթին թիրախավորում է Արցախի հայաթափումը և Արցախում էթնիկ զտում իրականացնելը»,- ասաց Գեղամ Ստեփանյանը՝ նշելով, որ դա արվել է նաև խորհրդային տարիներին, տեղեկացնում է A1Plus.am-ը։

Հիշեցնենք՝ ՀՀ և ԱՀ ՄԻՊ-երը առցանց քննարկում են Ադրբեջանի էթնիկ ատելության քաղաքականության դրսևորումներն ու հետևանքները։