Զելենսկու խոսնակ․ Մեր խնդիրն է մեր տարածքների ազատագրումը, ոչ թե Կրեմլը

Պատերազմում Ուկրաինայի խնդիրն է ազատագրել գրավյալ տարածքները, այլ ոչ թե հարվածներ հասցնել Մոսկվային։ Այս մասին հայտարարել է Ուկրաինայի նախագահի խոսնակ Սերգեյ Նիկիֆորովը՝ BBC News-ի համար մեկնաբանելով Մոսկվայում տեղի ունեցած գիշերային միջադեպը։

«Մենք տեղեկություններ չունենք Կրեմլի վրա այսպես կոչված գիշերային հարձակումների մասին, բայց, ինչպես բազմիցս հայտարարել է Նախագահ Զելենսկին, Ուկրաինան բոլոր առկա ուժերն ու միջոցներն ուղղում է սեփական տարածքների ազատագրմանը, այլ ոչ թե օտարների վրա հարձակմանը»,-ասել է Նիկիֆորովը։

Միևնույն ժամանակ, Ուկրաինայի նախագահի խոսնակը նշել է, որ Մոսկվայում տեղի ունեցածը չի կարելի ահաբեկչություն համարել՝ ի տարբերություն Դնեպրի և Ումանիի բարձրահարկ շենքերի վրա ռուսական հրթիռային հարվածների:

«Իսկ այն, ինչ տեղի ունեցավ Մոսկվայում, ակնհայտ է, որ իրավիճակը սրվում է մայիսի 9-ին ընդառաջ»,-ասել է Նիկիֆորովը։

Մայիսի 3-ի գիշերը անհայտ անօդաչուն բախվել է Կրեմլի համալիրի տարածքում գտնվող շենքերից մեկի տանիքին: Արդյունքում տեղի է ունեցել տեղային հրդեհ։ Տուժածների մասին չի հաղորդվում:

Կրեմլի մամուլի ծառայությունը հայտարարել է, որ տեղի ունեցածը Մոսկվան գնահատում է «որպես ծրագրված ահաբեկչական գործողություն և Պուտինի դեմ մահափորձ»: Տեղի ունեցածի համար ռուսական իշխանությունները մեղադրում են «Կիևյան ռեժիմին»։

Դրանից հետո Մոսկվայում որոշել են ամբողջությամբ արգելել անօդաչուների թռիչքները։

News.am