«Ես մամուլից եմ իմացել». Փաշինյանը մեկնաբանել է ԼՂ–ի մասով Պուտինի հայտարարությունը

ՀՀ վարչապետ Նիկոլ Փաշինյանը մեղադրեց ՌԴ նախագահ Վլադիմիր Պուտինին 2020 թվականի եռակողմ հայտարարությանը հակասելու համար։ Փաշինյանը նման մեղադրանք հնչեցրեց Հանրային հեռուստաընկերության եթերում` մեկնաբանելով ՌԴ նախագահի այն հայտարարությունը, որ ՀՀ–ն է հրաժարվել ԼՂ–ից` այն ճանաչելով Ադրբեջանի մաս, իսկ ՌԴ–ին տեղյակ չեն պահել։

«2020 թվականի նոյեմբերին և դեկտեմբերին ՌԴ նախագահը հայտարարեց, որ Լեռնային Ղարաբաղն Ադրբեջանի մաս է։ Այդ հայտարարությունները հրապարակային են և այսօր էլ կան վիդեո տարբերակով։ Ես մամուլից եմ իմացել, որ ՌԴ–ն նման հայտարարություն է արել»,–ասաց նա։

Այնուհետև Փաշինյանը հայտարարեց, որ 2020 թվականի 44–օրյա պատերազմից հետո, երբ Ադրբեջանը ռազմական գործողություններ է կատարել ՀՀ–ի և ԼՂ–ի դեմ Հայաստանը դիմել Է ինչպես ՀԱՊԿ–ին, այնպես էլ ՌԴ–ին, բայց համապատասխան արձագանք չի ստացել։

«Բոլոր դեպքերում ստացել ենք 0 արձագանք»,–ասաց նա։

ՀՀ վարչապետը նաև հիշեցրեց, որ 2022 թվականի փետրվարին Ռուսաստանի և Ադրբեջանի միջև հռչակագիր է ստորագրվել , որով երկու երկրների հարաբերությունները բարձրացվել են ստրատեգիական մակարդակի և կողմերը պայմանավորվել են չկատարել այնպիսի գործողություններ, որ մյուս կողմի մեկնաբանությամբ կհակասեն իրենց ազգային շահերին։

Արձագանքելով ՌԴ ԱԳՆ–ի այն հայտարարություններին, որ հենց Հայաստանը չի կատարել եռակողմ հայտարարության կետերը` Փաշինյանը խորհուրդ տվեց կարդալ եռակողմ հայտարարությունը, 8–րդ կետը ներառյալ, տեսնել` ով ինչ կետ չի կատարել։

«Էնպես չի, որ չենք գնում ռուսական հարթակներում բանակցությունները շարունակելու, ուղղակի պետք է եռակողմ հայտարարությունը ընթերցվի, այսօր գետնի վրա եռակողմ հայտարարությունը գոյություն չունի։ Եվ այդ հայտարարությունը ջրել են իրադարձությունները, մեր ստորագրությունը դեռ կա այդ հայտարարության տակ»,–ասաց նա։

Նշենք, որ ՀՀ վարչապետը Պուտինի հայտարարություն ասելով նկատի ունի ՌԴ նախագահի` հարցազրույցներից մեկում ասած հետևյալ միտքը. «Միջազգային իրավական տեսակետից այդ տարածքները (Լեռնայի Ղարաբաղը) Ադրբեջանի Հանրապետության անբաժանելի մասն են, Հայաստանն ինքը չի ճանաչել Լեռնային Ղարաբաղի անկախությունը, և նկատի ունենալով այս հանգամանքը, ԼՂ–ն միջազգային իրավունքի տեսանկյունից նույնպես Ադրբեջան է»։

Sputnik Արմենիա