Ռուսաստանում աշխատանքային միգրանտների քննությունների համակարգը կարող է փոխվել

Կրթության և գիտության ոլորտում վերահսկողության դաշնային ծառայությունը (Ռոսոբրնադզոր) չի բացառում միգրանտների համար քննությունների բալային համակարգի փոփոխությունը և քննության մեջ բանավոր խոսքի ստուգման ներառումը։ Տեղեկությունը, հղում անելով գերատեսչության մամուլի ծառայությունը, հայտնել է ՌԲԿ-ն:

«Մեր երկրում գտնվելու ընթացքում միգրանտների մեծ մասը կյանքի տարբեր իրավիճակներում պետք է հենց բանավոր հաղորդակցություն իրականացնի ռուսաստանցիների հետ», - ասել են ծառայությունից:

Նաև նշել են, որ այսօրվա դրությամբ բանավոր մաս չկա միայն աշխատանքի թույլտվություն կամ արտոնագիր ստանալու քննությունում, քննության անցկացման մնացած մակարդակների համար նախատեսված է «խոսել» բաժինը:

Աշխատանքային միգրանտների համար քննության մեջ «խոսել» բաժինը ներառելու համար անհրաժեշտ կլինի փոփոխություններ կատարել ռուսաց լեզվով` որպես օտար լեզու, Ռուսաստանի պատմության և Ռուսաստանի Դաշնության օրենսդրության հիմունքների քննություն անցկացնելու մասին կանոնակարգում: Ծառայությունը նաև նշել է, որ կարելի է վերանայել օտարերկրացիների համար քննության նվազագույն միավորը, որն անհրաժեշտ է կացության կարգավիճակ կամ քաղաքացիություն ստանալու համար:

Նվազագույն միավորը ներկայիս 50 միավորից 80-ի բարձրացնելու առաջարկով, ինչպես նաև քննության մեջ բանավոր խոսքի ստուգում ներառելու առաջարկով ՌԲԿ-ին տված հարցազրույցում հանդես է եկել Պուշկինի անվան ռուսաց լեզվի ինստիտուտի ռեկտոր Նատալյա Տրուխանովսկայան:

Նա նաև նշել է, որ խոսելը հանվել է աշխատանքային միգրանտների քննությունից 2021 թվականին: Միևնույն ժամանակ, ինստիտուտի կարծիքով, բանավոր կենդանի հաղորդակցությունը հիմնական երաշխիքն է այն բանի, որ ապագա աշխատանքային միգրանտը կկարողանա պատշաճ կերպով կատարել մասնագիտական գործողությունները և սոցիալիզացվել հասարակության մեջ:

Ապրիլի 16-ին «Ռոսոբրնադզորը» հայտնել է, որ նախազգուշացրել է հինգ բուհերի, այդ թվում՝ Պուշկինի ինստիտուտին, միգրանտների համար ռուսաց լեզվի քննություն անցկացնելիս պահանջների խախտման անթույլատրելիության մասին:

Sputnik Արմենիա