Ասադը մերժել է Էրդողանի առաջարկը. Սիրիայի հարցով հանդիպում չի լինի

Սիրիայի նախագահ Բաշար Ասադը դրական պատասխան չի տվել իր թուրք գործընկեր Ռեջեփ Թայիփ Էրդողանի՝ երկու երկրների միջև հարաբերությունների կարգավորման հարցով հանդիպելու առաջարկին: Այս մասին այսօր լրագրողներին ասել է Էրդողանը։

«Մենք Ասադին հանդիպելու առաջարկ ենք արել, բայց դրական պատասխան չենք ստացել», - ասել է Թուրքիայի նախագահը։

Սիրիայում ճգնաժամը սաստկացել է նոյեմբերի 29-ին՝ «Հայաթ Թահրիր աշ Շամ»-ի* (նախկին անվանումը ՝ «Ջեբհաթ ան Նուսրա»՝ ՌԴ-ում արգելված ահաբեկչական կազմակերպություն) և սիրիական ընդդիմության այլ զինված կազմավորումների հետ համատեղ լայնածավալ գործողության մեկնարկից հետո: Զինյալներն Իդլիբի հյուսիսից շարժվել են դեպի Հալեպ և Համա։

Նոյեմբերի 30-ին ահաբեկիչները վերահսկողության տակ են վերցրել մեծությամբ երկրորդ սիրիական քաղաքը՝ Հալեպը և նրա շրջակայքը` ներառյալ միջազգային օդանավակայանը և Քուվեյրիս ռազմական ավիաբազան: Սա 2011թ. սիրիական հակամարտության սկզբից ի վեր գրոհայինների՝ Հալեպի ամբողջական գրավման առաջին դեպքն է: Մինչև 2016-ի վերջը զինված ընդդիմությունը վերահսկում էր քաղաքի միայն արևելյան մասը, բայց սիրիական բանակը, Ռուսաստանի օդատիեզերական ուժերի աջակցությամբ, այնտեղից դուրս մղեց հակակառավարական զորքերին:

Հալեպի գրավումից հետո ահաբեկչական խմբավորումները փորձեցին առաջ շարժվել Համա քաղաքի ուղղությամբ՝ գրավելով Մաարեթ Նուուման բնակավայրը։ Սակայն դեկտեմբերի 1-ին սիրիական բանակը հայտարարեց Համայում գրոհայինների առաջխաղացումը կանխելու և հակահարձակման անցնելու մասին, որի ընթացքում ազատագրվեցին մի քանի բնակավայրեր:

* Ռուսաստանի Դաշնությունում արգելված ահաբեկչական կազմակերպություն:

Sputnik Արմենիա