«Լիարժեք երաշխավորություն ստանալ հնարավոր չէ». ԱԳ փոխնախարարը՝ Ադրբեջանի հնարավոր հարձակման մասին (ՏԵՍԱՆՅՈՒԹ)

Իհարկե, լիարժեք երաշխավորություն ստանալ հնարավոր չէ, բայց մենք պետք է անենք այն հնարավորը, որպեսզի նվազեցնենք այդ ռիսկերը: Այդ մասին, այսօր՝ մարտի 24-ին, ԱԺ-ում լրագրողների հետ ճեպազրույցի ժամանակ ասաց ԱԳ նախարարի տեղակալ Պարույր Հովհաննիսյանը՝ անդրադառնալով նրան, որ Նիկոլ Փաշինյանը չի հերքել, որ հնարավոր է՝ պայմանագիրը կնքվի և հետո կրկին Ադրբեջանը հարձակվի:

«Իհարկե, համաձայնագրի կնքումը ևս քայլ է, որպեսզի ապահովենք նման իրավիճակը։ Համաձայնագրի դեպքում այդ ռիսկը նվազում է առավել, քանի որ ունենք նաև միջազգային հանրության ուշադրությունը: Հայտարարությունը, որ ավարտել ենք բանակցությունները տեքստի շուրջ, տեսեք ինչ հայտարարություններ առաջացրեց ամենատարբեր երկրներից։ Այսինքն այստեղ պետք է նայենք, թե ինչքանով մենք կարող ենք նվազեցնել նման ռիսկերը»,-ասաց նա:

Հարցին՝ միջազգային երաշխիքներ տրվելու են արդյոք, Պարույր Հովհաննիսյանն ասաց. «Գիտեք, որ կարևորագույն երաշխավորողը ՄԱԿ-ի անվտանգության խորհուրդն է, և մենք տեսանք, որ բանակցությունների ավարտը ողջունեցին ՄԱԿ-ի ԱԽ բոլոր հինգ մշտական անդամները՝ ԱՄՆ-ն, Մեծ Բրիտանիան, Ֆրանսիան, Չինաստանը և Ռուսաստանը»:

Ինչ վերաբերում է նրան, թե արդյոք այդ երկրները ցանկություն ունեն հանդես գալ որպես միջնորդ կամ երաշխավոր, նա արձագանքեց. «Այս պահին չեմ կարող պատասխանել այդ հարցին, բայց միջազգային ինստիտուտները այնտեղ են, թե ԵԱՀԿ-ն, թե ՄԱԿ-ը, թե այլ ձևաչափերը:

Մենք թե ՌԴ-ի, թե բոլոր մեր գործընկերների հետ, որոնք կարող են նպաստել այս գործընթացին, իհարկե, արձագանքում ենք և և քննարկում ենք:

News.am