«Պատիվ ունեմ» խմբակցությունը որոշել է չմիանալ Մարուքյանին վարչապետ առաջադրելու գործընթացին

ՀՀ ԱԺ «Պատիվ ունեմ» խմբակցությունը որոշել է չմիանալ պատգամավորներ Հովիկ Աղազարյանի և Հակոբ Ասլանյանի ներկայացրած վարչապետի թեկնածու Էդմոն Մարուքյանի առաջադրման գործընթացին:

Ավելի վաղ հայտնել էինք, որ «Քաղաքացիական պայմանագրից» հեռացված Հովիկ Աղազարյանն ու Հակոբ Ասլանյանը վարչապետի թեկնածու են առաջադրում «Լուսավոր Հայաստան» կուսակցության նախագահ Էդմոն Մարուքյանին:

«Ներկայացվող թեկնածուն իր քաղաքական հետագծով ոչնչով չի տարբերվում գործող կառավարիչներից և նույնչափ կրում է մեր երկրի ծանր իրավիճակի պատասխանատվությունը։ Այլ կերպ ասած՝ «Պատիվ ունեմ» խմբակցությունը դեմ է Նիկոլ Փաշինյանին «Նիկոլ Փաշինյան 2»-ով փոխարինելու գործընթացին, հետևաբար թեկնածուի հետ հանդիպման անհրաժեշտություն չենք տեսնում»,– հայտարարել է «Պատիվ ունեմ խմբակցությունը։

Հիշեցնենք` ընդդիմադիր ակտիվիստ, քաղաքական գործիչ Էդգար Ղազարյանն ու «Վետօ» շարժման անդամ Նարեկ Մալյանը ապրիլի 28-ին 107 նամակներ ուղարկեցին ԱԺ 107 պատգամավորներին՝ առաջարկելով խելամիտ ժամկետում վարչապետի իմպիչմենտ նախաձեռնելու գործընթաց սկսել։

Մայիսի 2-ին «Հայաստան» խմբակցությունը հայտարարեց, որ պատրաստ է միանալ ՀՀ վարչապետ Նիկոլ Փաշինյանի նկատմամբ իմպիչմենտ նախաձեռնելու գործընթացին, եթե նման գործընթաց նախաձեռնողները կարողանան ապահովել պակասող 8 պատգամավորի ստորագրությունը։

«Պատիվ ունեմ» խմբակցությունը մայիսի 6-ին պատասխանեց վարչապետին անվստահություն հայտնելու գործընթաց նախաձեռնելու առաջարկին։

Մասնավորապես խմբակցության պատգամավորները վերահաստատեցին, որ այս պահին իշխանափոխության հասնելու ամենահավանական տարբերակը վարչապետին անվստահություն հայտնելու գործընթացն է։ Միաժամանակ հայտարարեցին, որ այս պահին չունեն վարչապետի թեկնածու և իրենց պատրաստակամությունը հայտնեցին առանց որևէ նախապայմանի քննարկելու թեկնածուի հարցը։

Sputnik Արմենիա