Կարինե Դանիելյան․ Պլաստիկե իրերի արտադրությունը սահմանափակող օրենք է անհրաժեշտ

Միանշանակ է, որ պլաստիկե իրերի արտադրությունը Հայաստանում պետք է հնարավորինս սահմանափակվի. ոլորտը կարգավորող օրենք է անհրաժեշտ, Aysor.am-ի թղթակցի հետ զրույցում ասաց «Հանուն կայուն մարդկային զարգացման» ՀԿ նախագահ, բնապահպան Կարինե Դանիելյանը՝ անդրադառնալով փաստին, որ Եվրոպայի խորհրդի հրամանագրով նոր սահմանափակումներ են նախատեսվում որոշ մեկանգամյա օգտագործման պլաստիկե առարկաների համար:

Մասնավորապես, արգելվում է օգտագործել այն պլաստիկե առարկաները, որոնց համար կա այլընտրանք: Հրամանագրի համաձայն՝ 2021-ից կարգելվի պլաստիկե ափսեների, սպասքի այլ պարագաների, ձողիկների և բամբակով փայտիկների օգտագործումը:

«Հայկական ընտանիքներում պլաստիկից իրեր շատ են օգտագործվում։ Մենք պետք է փոխարինող տարբերակ գտնենք։ Իհարկե, եթե խանութ ես գնում, կարող ես տանից կտորե տոպրակ վերցնել, սակայն արդեն խանութում միս կամ թխվածք գնելիս դրանք դնում են ցելոֆանե տոպրակների մեջ։ Մյուս կողմից, եթե ուզում ենք ցելոֆանե տոպրակները փոխարինել էկոլոգիապես մաքուր, թղթե տոպրակներով, ապա մենք նախ պետք է այդքան թուղթ ունենանք։ Անտառնե՞ր պետք է կտրենք, թե անտառներ աճեցնենք», - հարց ուղղեց մեր զրուցակիցը։

Կարինե Դանիելյանի խոսքով՝ ներկայումս Արևմուտքում ուսումնասիրություններ են կատարվում՝ բնության մեջ քայքայվող պլաստիկ ստանալու ուղղությամբ, ինչն էլ կարող է լավ այլընտրաք դառնալ չքայքայվող պլաստիկին։

«Բոլոր դեպքերում պետք է լուծումներ տրվեն, ինչից հետո միայն արգելքներ սահմանվեն։ Մինչ այդ՝ ակնհայտ է, որ սպասարկման ոլորտում ցելոֆանե տոպրակների կիրառությունը կարելի է եռակի կրճատել։ Արդեն փաթեթավորված ապրանքն ուղղակի անիմաստ է նորից տեղավորել տոպրակի մեջ», - նկատեց բնապահպանը՝ հատուկ ուշադրություն հրավիրելով նաև աղբի տեսակավորման անհրաժեշտության վրա։