Չիլիի պատգամավորների պալատը որոշում է ընդունել` ի աջակցություն Արցախի

Չիլիի Պատգամավորների պալատը բանաձև է ընդունել` ի աջակցություն Արցախի: Չիլիի օրենսդիր մարմինը խնդրել է նախագահին «տեղեկացնել Ադրբեջանին, Հայաստանին և Լեռնային Ղարաբաղի տարածքին այն մասին, որ Չիլին կոչ է անում անհապաղ դադարեցնել հարձակումները և շարունակել հակամարտության խաղաղ, իրավական և պատմական լուծում փնտրել ՄԱԿ-ում և միջազգային կազմակերպություններում` միջազգային օրենսդրությանը և ուժի կիրառման արգելման, ազգերի ինքնիշխանության նկատմամբ հարգանքի, ժողովուրդների ինքնորոշման և վեճերի խաղաղ կարգավորման սկզբունքներին համապատասխան»:

Բացի այդ, նախագահից պահանջվել են «ցույց տալ բոլոր միջազգային ատյաններում և ֆորումներում, որոնցում նա մասնակցում է` լինի դա գլոբալ, տարածաշրջանային, թե երկկողմ, անհրաժեշտությունը, որպեսզի բոլոր անդամ պետությունները դիմեն հակամարտության կողմերին խաղաղ կարգավորման որոնման նմանատիպ կոչով»:

Վերջապես, մերժվել են «հակամարտության կողմ չհանդիսացող ցանկացած կառավարության կողմից ռազմական գործողություններին աջակցելու և ռազմական օգնություն առաջարկելու գործողությունները», ինչը հստակ մատնանշում է Թուրքիայի ներգրավվածությունը հակամարտությանը:

Բանաձևում շեշտվում է, որ «2020 թվականի սեպտեմբերի 27-ին` կիրակի օրը, Ադրբեջանը լայնամասշտաբ հարձակում է սկսել Լեռնային Ղարաբաղի (Արցախի) վրա, որի արդյունքում մի քանի ժամվա ընթացքում մի քանի քաղաքներում սպանվել են հարյուրավոր մարդիկ` զինվորականներ և քաղաքացիական անձինք»:

«Չափազանց կարևոր է, որպեսզի բոլոր երկրները, որոնք դիվանագիտական, հյուպատոսական կամ առևտրային հարաբերություններ ունեն հակամարտող երկրների հետ, միանան այս կոչին, քանի որ առճակատումը կարող է անցանկալի հետևանքներ ունենալ, հատկապես` օտարերկրյա պետությունների և հատկապես Թուրքիայի հնարավոր միջամտության պատճառով, որը 1915 թվականին իրականացրեց 20-րդ դարի առաջին ցեղասպանությունը հայ ժողովրդի նկատմամբ»,- նշվում է բանաձևում, տեղեկացնում է News.am-ը։