Տավուշի մարզում նախընտրական քարոզարշավը շարունակում է այնպիսի սյուժեներ հրամցնել, որոնք կարելի է ներառել քաղաքական սոցիոլոգիայի դասագրքերում։ Այս անգամ լրագրողների ուշադրությունը գրավել է Կողբ գյուղում կայացած հանրահավաքը, որի մասնակիցների թվում անսպասելիորեն քիչ չէին տեղի դպրոցների և բյուջետային հիմնարկների ներկայացուցիչները։
Ամեն ինչ սկսվել է մի հարցից, որը հնչում էր բավականին սովորական. ներկաներից ո՞վ է կամավոր եկել վարչապետի հետ հանդիպմանը։ Պատասխաններն էլ ավելի հետաքրքիր են ստացվել։
Կողբի միջնակարգ դպրոցի տնօրեն Հայկուհի Ալեքսանյանը հայտնել է, որ միջոցառմանը եկել է ուսումնական հաստատության գրեթե ողջ կոլեկտիվը՝ մանկավարժական կազմը, տեխնիկական աշխատողները և վարչատնտեսական անձնակազմը։
«Այո՛, բոլորը եկել են։ Որովհետև բոլորս աջակցում ենք համար 16-ին և պատրաստ ենք նույն կազմով գալ հունիսի 7-ի ընտրություններին»,- հայտարարել է տնօրենը։
Հավաքվածների կուսակցական պատկանելության մասին ճշտող հարցին նա պատասխանել է, որ աշխատակիցների մեծ մասը ձևականորեն անկուսակցական է, սակայն «գրեթե բոլորը համակրում են «Քաղաքացիական պայմանագրին»»։
Երբ լրագրողները հիշեցրել են վարչական ռեսուրսի կիրառման և քաղաքական միջոցառումներին բյուջետային հիմնարկների աշխատողների զանգվածային ներգրավման մասին պարբերաբեր հնչող մեղադրանքները, Ալեքսանյանը վստահորեն հերքել է նման ենթադրությունները։
«Ոչ մի ստիպողականություն չի եղել։ Մարդկանց պարզապես տեղեկացրել են նախընտրական հանդիպման մասին, և նրանք եկել են կամավոր»,- վստահեցրել է Ալեքսանյանը։
Հավաքվածների թվում եղել են ոչ միայն ուսուցիչներ, այլև տեղի Մշակույթի տան աշխատակիցներ՝ ընդհուպ մինչև հավաքարարները։ Նրանք բոլորը եկել էին վարչապետին աջակցելու համար։
Հատկապես ուշագրավ է ստացվել Կողբի թիվ 1 դպրոցի տնօրենի հետ զրույցը։ Նախընտրական միջոցառումից ստացած տպավորությունների մասին հարցին նա պատասխանել է հակիրճ և հուզական. «Ես հիացած եմ մեր վարչապետով։ Մենք մեծ սպասելիքներ ունենք, սպասում ենք հաղթանակի»։
Հայոց լեզվի ուսուցչուհիներից մեկն էլ հայտարարել է, որ ցանկանում է, որ «բոլորը ընտրեն մեր վարչապետին», քանի որ հենց նրա հետ է կապում երկրի ապագան։
Պատկերը ստացվել է գրեթե կատարյալ ձևով. դպրոցների տնօրեններ, ուսուցիչներ, տեխնիկական անձնակազմ, մշակութային հաստատությունների աշխատակիցներ, և բոլորը՝ ինչպես մեկ մարդ, եկել են բացառապես սեփական նախաձեռնությամբ։ Ընտրարշավի թեժ պահին նմանատիպ միահամուռ քաղաքացիական ակտիվությունը պարզապես զարմացնում է։
News.am
