ՀՀ դատախազությունը պնդում է, որ «Արարատցեմենտի» մասնավորեցման գործընթացում նոր խախտումներ են հայտնաբերվել։
Ըստ հաղորդագրության՝ Արարատ համայնքի նախկին ղեկավար Ա.Բ.-ն, «Արարատցեմենտի» աշխատակցի օժանդակությամբ իր պաշտոնեական դիրքը ծառայության շահերին հակառակ օգտագործելով, խախտել է մի շարք օրենսդրական պահանջներ: Մասնավորապես 2009 թվականի սեպտեմբերի 22-ին, ձևական աճուրդների եղանակով ընկերությանն է օտարել համայնքին որպես արոտավայր փոխանցված, 74.1 հա մակերեսով հողամասերը:
Դատախազը մայիսի 27-ին ներկայացրել է հանցանքի մասին հաղորդում, որը հասցեագրվել է Հակակոռուպցիոն կոմիտեին՝ վարույթ նախաձեռնելու հարցը լուծելու համար:
Նույն օրը դատախազության կողմից հայցադիմում է ներկայացվել Հակակոռուպցիոն դատարան ընդդեմ Արարատ համայնքի, «Արարատցեմենտ» ընկերության և ընկերության աշխատակից Ա.Ա.-ի՝ աճուրդներն անվավեր ճանաչելու և անվավերության հետևանքներ կիրառելու պահանջով։
Ուսումնասիրություններն ընթացքի մեջ են:
ՀԻշեցնենք` «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանը Լոռու մարզի Շնող համայնքում քարոզարշավի ժամանակ հայտարարեց, որ շատ շուտով ԲՀԿ ղեկավարի` Գագիկ Ծառուկյանի բիզնես- ողնաշարը` Արարատի ցեմենտի գործարանը, լինելու է պետական և պատկանելու է Հայաստանի Հանրապետությանը, նշանակվելու է ժամանակավոր կառավարիչ։ Ավելի ուշ Ծառուկյանն արձագանքեց այս հայտարարությանը` նշելով, որ եթե գործող իշխանությունը խլի գործարանը, դրա պատասխանը տալու է ամբողջ պետությունը, քանի որ դա մասնավոր սեփականություն է։
Sputnik Արմենիա
