ԵԱՀԿ Խորհրդարանական վեհաժողովի (ԵԱՀԿ ԽՎ) շուրջ 100 պատգամավոր և աշխատակից ավելի քան 30 երկրից Հայաստան կժամանեն՝ դիտարկելու հունիսի 7-ին կայանալիք խորհրդարանական ընտրությունները։
«Արմենպրես»-ի փոխանցմամբ՝ այս մասին հաղորդագրություն է տարածել ԵԱՀԿ խորհրդարանական վեհաժողովը։
Նշվում է, որ 1995 թվականից ի վեր սա արդեն տասներկուերորդ անգամն է, երբ կազմակերպությունը հետևում է Հայաստանում անցկացվող ընտրություններին։
ԵԱՀԿ կարճաժամկետ դիտորդական առաքելության հատուկ համակարգող և ղեկավար է նշանակվել Նիդերլանդների Սենատի անդամ Ֆարահ Քարիմին, իսկ ԵԱՀԿ ԽՎ դիտորդական պատվիրակությունը կգլխավորի Չեռնոգորիայի խորհրդարանի պատգամավոր Եվրոսիմա Պեյովիչը։
Քարիմին և Պեյովիչը նախընտրական համատեղ մեկնաբանություն են հրապարակել «Հայաստանը քվեարկում է աշխարհաքաղաքական և ժողովրդավարական խաչմերուկում» խորագրով, որում անդրադարձել են պատմական զարգացումներին, իրավական բարեփոխումներին և ներքաղաքական բևեռացմանը, որոնք, նրանց գնահատմամբ, ազդում են ներկայիս ընտրական միջավայրի վրա։
ԵԱՀԿ ԽՎ դիտորդները կաշխատեն ԵԱՀԿ/ԺՀՄԻԳ-ի դիտորդական առաքելության հետ, որը ղեկավարում է Յանեզ Լենարչիչը, ինչպես նաև Եվրոպայի խորհրդի խորհրդարանական վեհաժողովի և Եվրոպական խորհրդարանի դիտորդական պատվիրակությունների հետ։
Ընտրություններից առաջ դիտորդները հանդիպումներ կունենան պետական մարմինների, Կենտրոնական ընտրական հանձնաժողովի, քաղաքական կուսակցությունների և դաշինքների, քաղաքացիական հասարակության, լրատվամիջոցների ու անկախ փորձագետների ներկայացուցիչների հետ։ Այնուհետև նրանք կայցելեն Հայաստանի տարբեր մարզեր՝ ընտրական գործընթացի գնահատման նպատակով։
Դիտորդական առաքելությունների նախնական եզրակացությունները կներկայացվեն ընտրություններից հետո կայանալիք համատեղ մամուլի ասուլիսում։
Ֆարահ Քարիմին նշել է, որ Հայաստանը ընտրություններին մոտենում է էապես վերանայված ընտրական համակարգով։
«Հայաստանն այս ընտրություններին պատրաստվում է էապես վերանայված ընտրական համակարգով, որն ուղղված է այնպիսի կարևոր հարցերի լուծմանը, ինչպիսիք են ընտրակաշառքը, ընտրողների վրա ճնշումը և վարչական ռեսուրսների չարաշահումը։ Այժմ մեր դերն է ուշադիր հետևել, թե ինչպես են այս նոր օրենքները գործում գործնականում, հատկապես հասարակության բարձր բևեռացման պայմաններում, որը բնութագրվում է քաղաքական ուժերի միջև պառակտող կոշտ հռետորաբանությամբ»,- ասել է նա։
